Prólogos das obras incluídas - SLI

O manuscrito, ó ser unha obra inédita e case descoñecida, non deixou pegadas nos diccionaristas
posteriores. A obra lexicográfica de Marcial Valladares segue a pauta propia da lexicografía
castelá de finais do século XIX e á vez presenta certas características que o diferencian
doutras obras contemporáneas: vocabulario pertencente ó galego vivo, marca do timbre
vocálico con precisión e con coherencia, presencia de termos comúns ó castelán, ausencia de
afán normativista, profusión de exemplos autorizando o lema, orixe dalgunhas palabras....
Comete os erros típicos dos diccionarios do momento, como a inclusión de nomes propios, de
formas marcadas como femininos, plurais... A separación de acepcións e de palabras (pola
forma e nunca pola orixe) tampouco sería a correcta desde o punto de vista actual.
O labor lexicográfico de Marcial Valladares é realmente encomiable, non só en canto á
cantidade (máis de 13.000 voces recollidas) senón tamén no tocante á calidade: aplicaba criterios
na selección léxica e traballada con escrúpulo e con curiosidade. Adicou á lexicografía
unha boa parte da súa vida, ata que a saúde non lle permitiu seguir.
Por último, non quero deixar pasar esta oportunidade sen agradece-la colaboración de
todas aquelas persoas que dun xeito ou doutro participaron na edición do manuscrito, especialmente
ó ILG polas facilidades ofrecidas. Singularmente, cómpre lembra-la familia Ferreirós
que non permitiu que morrese a memoria de don Marcial Valladares.