Prólogos das obras incluídas - SLI

As especies recollidas son só as autóctonas máis algunhas, cultivadas ou autóctonas, de
interese agrícola ou cultural.
CONSIDERACIÓNS SOBRE O LÉXICO RECOLLIDO
Hai tempo un de nós foi consultado por un campesiño: "Oíu... vostede que entende disto,
¿cómo lle din a este arborecho?.
O noso compañeiro achegou-se ao "arborecho".
"Home, isto é unha nespereira".
O campesiño ficou un chisco abraiado e rosmou polo baixo, -"Xa dicía eu..., ¿sabe?, por aquí
a xente dálle en chamar manoliteiro porque críalos un veciño noso que chaman Manolito".
Co paso do tempo é posible que leamos nun diccionario a seguinte cita: Manoliteiro.- Así
coñécese na comarca de... a nespereira.
Nomes pantasmas de plantas, flores e árbores ferven a cachón na ola da lingua, recollidas en
vellos (e novos) diccionarios. Lembrémo-lo tricoco (un Haliotropium) citado en carta por
Sarmiento, recollido por F.J. Rodríguez, introducido por A. de la Iglesia, trabucado por Valladares -
que o fixo sinónimo de xirasol- e levado ao fin polo Prof. Pensado ao seu mundo de fantasía.