Prólogos das obras incluídas - SLI

En concreto, no referente ó problema de ordenación da letra c, optamos por
deixar unha soa entrada para as palabras que non tiñan ningunha alteración, é dicir, as
que aparecen exactamente iguais tanto entre as páxinas 21-30 como da 35 ata o final da
letra c. No caso de que houbese a máis mínima modificación, esta vaise ver reflectida,
segundo as normas e criterios desta edición (ó longo do vocabulario esta situación
repítese con certa frecuencia en palabras illadas e procedemos do mesmo modo ca neste
caso). O resto das palabras que non aparecían máis que nunha das dúas seccións
repetidas incorporámolas ó seu lugar alfabético correspondente.
Por outra banda, no manuscrito, Pintos a penas destaca graficamente algunhas
cuestións. Así, podemos facer mención a que tanto a entrada como a equivalencia van en
inicial maiúscula e que usa o subliñado nalgúns casos de palabras galegas utilizadas nas
definicións. En consecuencia, nesta edición, para facilita-la visualización e comprensión
do vocabulario, a partir de criterios actuais, adoptamos unha serie de normas que inciden
no orixinal, transformándoo levemente no plano formal, mais intentando que non sexa
así no do contido. Neste sentido, a supresión de formas repetidas -principalmente na letra
c, polo problema arriba expresado- coidamos que alixeira a consulta e aclara o contido.
Cómpre dicir igualmente que aquelas palabras ou frases que aparecen riscadas no
manuscrito (uns poucos casos) non se recollen nesta edición. Así, por exemplo, o autor
risca do orixinal a entrada “lentexa. Lenteja”, que en consecuencia non introducimos.
Velaquí os cambios con respecto ó manuscrito:
38