Prólogos das obras incluídas - SLI

Noso agradecimento á xenerosidade de quenes, emigrados na faiscante Caracas, na
terra venezolán, cada intre máis inzada de valores galegos, fixeron posibre a saída da obra por
eles tamén ferventemente agardada. Pois na emigración, a língoa sóa cecáis con meirande
forza e beleza, consola i ergue con líricas áas, fortece, e no esprito e na sociedade acrecenta
máis o sentimento dos outos destinos da Galiza. A língoa nosa, cada intre máis espallada nos
pobos e sociedás atlánticas, locirá novamente pra moitos, confirmará en outros a fé, ca saída
do Diccionario de Don Eladio Rodríguez González; é o romor da fala anterga e nova, gardada
nas súas follas, nada ó sol, e á bretema, á door, á dita e á morte, da mesma inmorredoira raíz
do corazón i esprito de cada galego, -merecente de sélo, alumno dos poetas ispirados-, e dos
longos silenzos e traballos de un pobo guiado por a man de Deus, pra alentar aínda saudosamente
máis aló dos marcos da vida e da morte.
Ramón OTERO PEDRAYO.