Prólogos das obras incluídas - SLI

Pra GALAXIA hoxe unha data de groria. Os reitores da empresa souperon enxergar
ben a prol da cultura galega, do seu espallamento, da obriga de pubricar dentro e fora da Galiza
-dentro ben perto, no corazón, a Galiza emigrada- o ser i ensoar a door e arelanza da Nosa
Terra. No comprimento do deber, nin porfias nin retesías de novos e vellos. Imponse de seu en
todo tempo, o froito celmoso, a honrada fábrica de unha grande obra da intelixenza e o amor.
Ó pubricar os novos a obra de un vello, procraman, lonxe de todo énfasis, como na alegría de
editar en galego páxinas inéditas do primeiro filosofo de Europa, e de espallar de cotío poemas,
ensaios e novelas de mozos, entra tamén a de ceibar do esquecemento un Diccionario,
frol e fariña, xuventude de un enteiro e nobre vivir. A verdade e valencia íntimas, non os ventos
da moda ou as polémicas das xeneraciós, presiden e ispiran a empresa, outa e xenerosa, da
nosa GALAXIA.
Noso agradecido sentimento pra os herdeiros do autor; e particolarmente, como persoeiro
da confianza de iles e de por sí, ó brilante escritor Don Xulio Rodríguez Yordi, quen
con amizade xentil puxo nas mans dos guieiros de GALAXIA o tesouro do libro, a prenda i
herdo máis fermosa i entranabre do seu pai. Con amor e respeto, dámolo á pubricidade. Confiamos
no trunfo, maino e calado, o xeito de trunfar propio das obras de fondos alicerces, de
outa e podente arquiteitura.