Prólogos das obras incluídas - SLI

Tanto o DRAG como Eladio Rodríguez, na maioría dos casos (pero non sempre,
sobre todo este último) citan a procedencia, e fano con expresións como: “Abonado por
Pintos”, “Según Pintos”, “Según el vocabulario de Pintos”, “Según el D. P.”, “Vocablo y
acepción de Pintos”, etc.
Carré Alvarellos, no seu Diccionario galego-castelán (primeira edición de 1928,
1º tomo-1931, 2º tomo; sucesivas edicións en 1933 e 1972) parece que introduce tamén
moitos vocábulos e acepcións de Pintos, pero xeralmente sen citar procedencia e
variando en ocasións parcialmente as palabras da definición, e finalmente o Diccionario
galego-castelán, de Franco Grande (1ª edición de 1968) recolle todo o que de Pintos
tomaran os anteriores diccionarios, citando en moitas ocasións a procedencia, tal e como
o fan as súas fontes e sen citala noutros casos (cando son voces presuntamente tomadas
de Pintos por Carré).
En xeral, e salvo modificacións voluntarias coma as de Carré, as voces e
acepcións son collidas tal cal están no manuscrito de Pintos. Non obstante, puidemos
rexistrar algunha mala lectura que vai pasando ós seguintes diccionarios. Así, da entrada
orixinal de Pintos “alloada. Pastel, amasijo”, o DRAG transcribe: “allonda. Pastel
amasijo”, que pasa deste xeito a Eladio.
Outro exemplo de mala lectura é a que fai Carré e que del toma Franco Grande,
referida á expresión de Pintos “leu, ó. Al descubierto, al desnudo”, que Carré converte
en: “len, ó. Al descubierto, al desnudo” e así a toma Franco Grande (non aparece en
Eladio Rodríguez).
34