Prólogos das obras incluídas - SLI

Temos que mencionar tamén a inclusión de termos coincidentes en forma e
significado co castelán, o que marca a diferencia coa maioría dos diccionarios da época,
que desbotan as formas coincidentes e se limitan a recolle-las voces “exclusivamente”
galegas.
Do mesmo xeito que Sarmiento, Pintos está libre dese prexuízo que tanto
funcionou no proceder lexicográfico inmediatamente posterior a el, e que
inconscientemente fai do galego unha lingua subalterna do castelán, ademais de causar
unha evidente confusión no usuario ó non saber se tal forma realmente non existe en
galego. A este respecto é moi ilustrativo que un lexicógrafo como Francisco Javier
Rodríguez na introducción ó seu diccionario faga especial fincapé nisto, xa que afirma:
"Es de saber que no incluyo en este diccionario, las voces comunes á gallegos y
castellanos, sinó las puramente gallegas".
3. Estructura interna do vocabulario
No plano lexicográfico, cómpre salientar que o autor non dá conta da categoría
gramatical das entradas. Isto constitúe unha carencia considerable, sobre todo no que se
refire a cuestións como os réximes verbais e á non distinción substantivo/adxectivo. Así
mesmo, o resto da información gramatical, como o xénero ou o número, tampouco se
reflicte no vocabulario. O problema está nas palabras nas que non hai concidencia de
xénero entre as dúas linguas, como suor, mel, leite, etc.
15