Prólogos das obras incluídas - SLI

Ademais, temos que facer referencia a que na elaboración houbo unha fase
fundamental seguida dunha serie de engadidos feitos a posteriori. En efecto, o corpo
fundamental do vocabulario está escrito cunha caligrafía firme, clara e coidadosa,
mentres que os engadidos, nas marxes ou entre liñas, mostran moitas veces un tipo de
letra non tan firme nin clara que pode deberse a que entre un e outro momento pasasen
anos e fosen introducidos por Pintos posteriormente, quizá xa na súa vellez.
Descrición formal
O manuscrito consta de noventa e sete páxinas, nas que se recollen unhas 7100
palabras (unha vez suprimidas para esta edición arredor dun cento de entradas repetidas)
escritas en folio, con tinta, a dúas columnas e cunha marxe esquerda bastante ampla. Na
cuberta figura en caracteres grandes a inscrición “Vocabulario Gallego-Castellano”. En
cada unha das páxinas aparece a entrada en galego e a equivalencia en castelán, ambas
con maiúscula inicial e unidas por unha liña de guións. (No caso de sinónimos galegos ós
que remite o autor a través do signo v., non hai sistematicidade, e unhas veces van en
maiúscula e outras en minúscula inicial. Por exemplo: orola v. Arola, pero: orto v.
horto, oxe v. hoxe, etc.). Así mesmo, hai gran cantidade de termos engadidos nas
marxes e mesmo entre as liñas primitivas. Tamén aparece un pequeno número de voces
escritas a lapis. Enriba de cada columna de equivalencias aparecen en tódalas follas os
termos “Gallego” “Castellano” e ó principio de cada letra e centrada na correspondente
columna a letra da que se trata.
10