lorca

4.2. Eduardo Blanco-Amor: embaixador da obra de Federico
Eduardo Blanco-Amor, que presumía como Federico de ter nacido co
século, desenvolveu un labor extraordinario en Arxentina, como cónsul e
vicecónsul da República. A defensa da España que representaba Manuel
Azaña, Fernando de los Ríos, Margarita Xirgu, Rivas Chérif e tantos outros
amigos de Federico, isto é, a España leal, ocupou a enerxía dos mellores
anos da vida de Eduardo. Os editoriais de Galicia, periódico que el dirixía,
son ardentes e valentes, arriscando o seu prestixio nunha Arxentina oficial
que non era moi proclive ós republicanos.
En «Carta abierta al director del diario de La Razón» (vid. Blanco-Amor,
1936b) sae en defensa de Federico, pois aludírase á súa homosexualidade
de maneira brutal, nunha caricatura do periódico na que se representaba
en figuración de invertido, como un chiste da «estética» e da ética fascista.
El, cheo de dor, pero tamén de carraxe, dá a cara polo amigo:
«(...)
Yo, señor director, me he honrado con la amistad personal
del gran desaparecido y con la de sus padres y hermanos...».
Pero non só a Federico, tamén a todos os seus amigos. O 28 de marzo
de 1937 sae o seu artigo «Ofensa y defensa de Margarita Xirgu» en Galicia,
en defensa da actriz. Era amiga súa, pero, sobre todo, era amiga de Federico,
e Eduardo denuncia os soterrados manexos para impedir a entrada en
Buenos Aires da Compañía teatral que dirixe a actriz. Di:
«... Tengo el honor altísimo de ser amigo de Margarita Xirgu.
Durante los ensayos de Yerma... he sido su visitante diario, llevado
por García Lorca y Rivas Chérif, en el Teatro Español de Madrid...».
E vai á cerna da cuestión:
«... Se teme a Margarita Xirgu por actriz y no por política. Su
venida será el ventarrón de aire puro y fresco de legítimo arte
español... Se teme a Margarita y a su animosa Compañía de muchachas
y muchachos... los más de ellos bautizados y todos confirmados
por la emoción lustral de aquel torrente de arte vivo que
era García Lorca y cincelados, palabra a palabra, por todas las jubias
exigentes de Rivas Chérif...».
192