Risco químico: Guía básica de produtos - Saúde Laboral

RISCO QUÍMICO capítulo 2. clasificación dos produtos
A continuación aparece un apartado de usos posibles da substancia. Esta información
procede dunha busca xeral e indícanse múltiples usos, máis dos que puideran
aparecer na ficha de seguridade do produto concreto, para poñer de manifesto a
versatilidade de certos produtos.
Información sobre o perigo:
Este apartado inclúe, por unha banda, unha frase resumo cos principais perigos
que representa a substancia, por exemplo, “produto inflamable e que pode
causar irritación da pel” e a continuación se facilita a información de clasificación
e etiquetaxe de acordo coa normativa do CLP e máis coa DSD/DPD. Con
respecto a este apartado, compre dicir que, como na actualidade aínda non
todos os produtos se atopan etiquetados segundo o CLP, esta clasificación
foi realizada por comparación, consultando diferentes fontes de información
como as NTP (Nota Técnica de Prevención) 726,727,880 e 881 1 do INSHT ou
a páxina da ECHA.
Nun apartado conxunto, a continuación, axúntase información sobre as propiedades
fisicoquímicas e o comportamento da substancia. Posibles reaccións perigosas
e algunha propiedade física destacable, como poden ser a temperatura
de inflamación ou a presión de vapor. Cando se traballa con produtos químicos
é importante coñecer o seu comportamento en contacto co aire, a humidade ou
con outras substancias que puideran atoparse ao seu redor, para poder establecer
procedementos de traballo seguros.
Inclúese neste formato, a continuación, información sobre a sintomatoloxía ocasionada
pola exposición á substancia. Aínda que, se o sistema preventivo funciona
de forma axeitada, debería minimizarse a exposición e non existir sobrexposición,
considérase interesante e necesario coñecer os efectos concretos que producen
as substancias para poder recoñecelos se fose o caso. Se un traballador/a se
atopa mareado ou con náuseas, ou comeza a sentir molestias nos ollos ou na
gorxa, pode recoñecer eses síntomas como ocasionados pola exposición a certo
produto, o que lle permitirá actuar en consecuencia.
1
NTP726: Clasificación e etiquetaxe de produtos químicos: sistema mundialmente harmonizado. NTP727: Clasificación e
etiquetaxe de produtos químicos: comparación entre o GHS e a regulamentación europea. NTP880: Regulación UE sobre
produtos químicos(III). Regulamento CLP: perigos físicos. NTP881: Regulación UE sobre produtos químicos (IV). Regulamento
CLP: perigos para a saúde e o medio ambiente.
62 Confederación Intersindical Galega