Risco químico: Guía básica de produtos - Saúde Laboral

RISCO QUÍMICO GUÍA BASICA DE produtos
1.2 Control da exposición a axentes químicos no traballo
1.2.1 Accións de control fronte á exposición a contaminantes químicos
A exposición laboral a un contaminante químico defínese como a situación de
traballo na que un individuo pode recibir a acción e sufrir o efecto dun axente
químico, supoñendo isto un posible dano para a súa saúde. Os contaminantes
químicos poden producir un dano de forma inmediata ou a curto prazo, intoxicación
aguda, ou xerar unha enfermidade profesional co paso dos anos, intoxicación
crónica.
Enténdese que existe exposición a un axente químico cando está presente no lugar
de traballo e se produce un contacto co traballador/a, normalmente por inhalación
ou por vía dérmica, pero tamén por vía dixestiva ou parenteral.
Previamente ao control da exposición a axentes químicos debe de existir unha
avaliación da exposición, que consiste en estimar a magnitude do risco e as
súas características, sendo o obxectivo final a obtención de datos suficientes para
decidir con criterio sobre as actuacións preventivas a emprender. Por este motivo,
a avaliación debe dar información non só sobre a magnitude do risco existente
debido á exposición, senón tamén das causas que xeran o risco.
Unha vez avaliada a exposición dos traballadores/as aos contaminantes químicos
presentes no seu lugar de traballo, disporase de información suficiente para avaliar
se esa situación supón un risco ou non para os traballadores/as. En caso de
existir un risco, será necesario eliminalo ou, se non é posible, reducilo ata valores
que poidan ser considerados como aceptables. Para iso haberá que establecer
unha serie de medidas correctoras que basicamente van actuar sobre a concentración
do contaminante na zona de respiración do traballador ou sobre o tempo
de exposición.
Estas medidas correctoras son o que se coñece como medidas de control, e
poden ser de diferentes tipos. A continuación aparecen esquematizados os distintos
tipos, hai que ter sempre presente que a aplicación de medidas de control
colectivas sempre debe ter prioridade fronte ás medidas de protección
individual.
Confederación Intersindical Galega 29