Risco químico: Guía básica de produtos - Saúde Laboral

RISCO QUÍMICO GUÍA BASICA DE produtos
3.3 Actuación en caso de fuga ou derrame
Un derrame ou fuga dun produto químico perigoso é un suceso que pode dar lugar
a consecuencias graves para as persoas, instalacións e o medio ambiente. En
ocasións, o risco de que se produza unha vertedura ou fuga non é valorado na súa
xusta medida, subestimándose ou simplemente obviándose. É frecuente observar
plans de emerxencia en instalacións industriais nas que se fabrican, investigan ou
se empregan produtos químicos perigosos, onde a única emerxencia de carácter
tecnolóxico que se contempla é o incendio. Consecuentemente, cando se produce
un suceso desa natureza, non se dispón da información suficiente sobre o
produto químico, non se coñecen claramente os recursos dispoñibles na empresa
para facer fronte a esa situación e orixínanse confusión e desorganización entre
o persoal que intervén no control da emerxencia, feito que pode levar a agravar
o problema.
As principais pautas de actuación no caso da verteduras accidentais ou fugas son,
en primeiro lugar, poñer todos os medios para que non se cheguen producir e en
segundo, seguir o protocolo de actuación establecido para o lugar de traballo.
Para iso, é básico que tal protocolo de actuación exista e sexa coñecido polos
traballadores/as afectados e o persoal de intervención. Se no centro se dispón
dun plan de emerxencias contra incendios, é posible aproveitar a súa estrutura
para desenvolver os supostos de derrame ou fuga.
Diferenciaremos, neste sentido, entre pequenos derrames de pouca extensión que
se poden producir con motivo da realización do traballo e derrames ou fugas de
gran extensión , que poden requirir un tratamento diferente por non poderen ser
controlados de forma rápida ou segura. Nese caso, haberá que poñer en marcha o
plan de autoprotección, informando da emerxencia por se é precisa a intervención
e a evacuación.
Pero no caso de pequenos derrames, pódese actuar rapidamente se se dispón
dos medios e coñecementos necesarios.
Confederación Intersindical Galega 167