Euskal Autonomia Erkidegoko flora baskular mehatxatua

Berehala antzematen da mehatxu-maila, hau da, landare mehatxatu bakoitzaren kategoria
babes-erregimen batetik bestera asko aldatzen dela. Landare bat mundu-mailan oso bakana izan
daiteke, bere banaketa-eremu globala oso txikia delako; baina bizi den eremuan populazio oparo
asko izan ditzake, eta litekeena da populazio horiek epe ertainean arrisku larririk ez izatea.
Hori gertatzen zaio Armeria euscadiensis espezieari, Bizkaiko eta Gipuzkoako kostaldeko endemismoari,
edo horren kidea den A. cantabrica –vasconica subsp.–ri (Toloño-Kantabria-Kodes
mendilerroetako endemismoari). Horrelako kasuetan, erkidegoa baino eremu zabalagoko legediek,
landareak mehatxu-maila altuetan zerrendatu ohi dituzte (Kalteberak edo Galtzeko Arriskuan).
Ostera, Erkidegoaren eremuko zerrendek, Bakanen edo Interes Berezikoen mailan sailkatu
ohi dituzte, landareok eskualdean duten arriskua, mundu-mailan mehatxatuta ez dauden espezie
batzuena baino askoz txikiagoa baita. Horrela, EAEn, Diphasiastrum alpinum likopodio txikia
Galtzeko Arriskuan dago, ezagutzen diren populazioak oso-oso txikiak direlako. Ostera, Europamailan,
92ko Habitat Arteztarauaren V. Eranskinean baino ez da ageri, naturan biltzeko eta ustiatzeko
kudeaketa-neurriak izan ditzaketen espezieen artean. Zerrenda guztietako (probintziakoak,
eskualdekoak, naziokoak edo nazioartekoak) mehatxu-mailak homogenizatzea ez da lan erraza.
Horren eragileak landareen banaketa-areak dira, izan ere, ez baitaude bi landare eremu berdinberdina
eta gainezargarria dutenik. Horrez gain, badakigu populazioek ale-kopuru eta bizkortasun
oso desberdinak izan ditzaketela. Ondorioz, itxuraz sinplea den gai honetan adostasuna lortzea
ez da batere erraza.
Edonola ere, indarrean dagoen “Espezie Mehatxatuen Euskal Zerrenda”, lehen pausua da
EAEko landareak legez babesteko, eta hainbat taldek Naturzaintzari, hots, Naturaren Kontseilu
Aholkulariari, egin diezazkioketen proposamenekin hobetu daiteke. Horri, abian jar daitezkeen
berreskuratze- eta kontserbazio-planak gehitzen baldin badiogu, etorkizunean posible izango da
landare batzuen mehatxu-mailak aldatzea, eta oraindik katalogatu gabe dauden beste batzuk legez
babesteko katalogoan.
SARRERA • INTRODUCCIÓN 29