eskuizkribuen azterketa eta iturriaren moldamoduak - Euskara

Anglaterran opari ikusgarririk eta Parisera jotzea erabakitzen du,
Espainiara eramateko horien bila.
Frantziako erregina, erregeorde lanetan bera, Anglaterrakoa
zer asmotan datorren jakinda, gortea bilarazten du eta senarra zenak
behiala emandako hitza (semea Espainiako Infantarekin ezkontzeko
konpromezua) gogorarazten du. Amak, semea ezkonadinean ikusita, orduko
konpromezua jakinarazi nahi lioke. Orleans eta Bourboneko dukeak, errege
zenarekin Espainiako bidaian egondakoak, Jean gazteari arazoaren berri
ematera doaz, Vincennes aldean basurde ehizean baitzebilen. Iristean
Jeanek, ordurako ohean zegoen arren, hartu egingo ditu eta mezua arretaz
entzun. Atzera lotara joanda ezin izango du begirik itxi, neskaren
edertasuna esan zioten bezain handia ote den pentsatuz.
Biharamonean, bere segizioko eta printzipalak leku sekretu
batean bilduko dituela agindu ondoren, amarengana doa izkutuan, Anglesak ez
dezan ezagutu, arazoari buruz hartu duen erabakiaren berri ematera.
Espainiara abiatuko da bere graduari ez dagozkion arropa disimulatuez
jantzirik, benetan nor den izkutatuz. Ailegatzean egiaztatuko du Infanta
dioten bezain ederra ote den eta harenganako bere amodioa. Elkar topatze
horren arabera hartuko du azken erabakia. Bidaiarako segizio ahalik eta
aberatsena izango du, beti ere ezagutua ez izateko modukoa eta bere
gudarozte eta karrosak beste bide batetik joango dira, egunero elkarren
berri izango dutelarik. Amaren adostasuna erabatekoa da. Aitaren altxorra
eskaintzen dio eta, bestalde, Pariseko ondasun eta jantzi dotoreak
bahitzeko agintzen, Anglaterrako erregerentzat zerbait agerian utzita. Jean
eta bere segiziokoak prest daudenean libratu egingo dituzte, horrela
Anglaterrakoa ere abiatu ahal izateko.
Erreginak Anglaterrekoa Parisen entretenitzen duen bitartean,
Jeanek Vincennes-en biltzen ditu bere soldadu eta segiziokoak eta eraman
beharreko aberastasun eta ondasunak pilatzen. Hornidura guztiak gertu
direla, bitan banaturik abiarazten ditu inongo susmorik egon ez dadin.
Berarekin joango diren ehun baroi eta ehun pajeak prest daudenean ematen
die bere gaitzizenaren berri: edozeinek galdetuta ere Jean de Paris dela
esan beharko dute, bertako burges baten seme, aitak hildakoan ondasun
handiak utzi dizkiona. Anglaterrakoa hurrengo egunean abiatuko dela
jakinik, Etampes aldera jotzen du Jeanek. Anglesak agertzen direnean
aurrera segitzen dute frantsesek, haien herota inguratzen zaien arte.
86