Hestoria de la Corredoria - Telecable

HESTORIA DE LA CORREDORIA
Equí vamos cuntavos una migayina de la hestoria’l nuesu barriu, el barriu de la
Corredoria d’Uviéu, un barriu que ye cuasi una pequeña ciudá yá que la población
estimada d’esta zona de la capital del Principáu ye d’unes 35 mil persones, esto ye,
cuasi’l 20% de la población total d’Uviéu.
La Corredoria foi dende tiempu atrás un llugar y pasu estratéxicu nes
comunicaciones de les rutes comerciales Atlántiques, apaeciendo yá en dellos testos de
la dómina la conquista romana d’Asturies.
Na actualidá son oxetu d’interés los siguientes puntos y aspeutos del nuesu
barriu, que gracies a la “Asociación Vecinal el Conceyín” vos cuntamos nós:
• Fuente los Cuatro Caños:
Ye la primer sena d’identidá de la zona, foi inaugurada nel añu 1790 y foi ún de
los primeros servicios colos que cuntó la zona. La so finalidá yera la de que nun sólo la
xente’l barriu, sinon tolos usuarios de la vía na que está, la carretera de Xixón qu’une
con Castiella, pudieren abastecese d’augua. La obra inicial atribuyese al arquitectu M.
Reguera.
Nun podemos escaecer el llavaderu que tien llindando con ella y sobre too la so
boina en forma de paragües que güei tovía se conserva y que foi obra del inxenieru
municipal Sánchez del Río, que dexó la so impronta en tol conceyu con obres
perimportantes.
Ye interesante pasase a ver esta fonte denomada de Cuatro Caños (anque namái
tien tres), cuando son les fiestes de San Xuan, fiestes que se celebren por tolo alto nel
mes de xunu nesti barriu.
Nestes feches al igual que toles fontes d’asturies, ésta ye vístía y engalanada
pergayolera y perguapa polos vecinos de la Corredoria, ganando yá munches vegaes los
distintos certámenes de decoración qu’empobina l’Ayuntamientu la ciudá.
• Moxón de la Media Legua a Uviéu:
Esti testimoniu en piedra que conmemora l’apertura de la nova vía con salida a
Castiella ye del añu 1789 y ta asitiada a Media Legua esauta de lo qu’enanates se
consideraba el términu d’Uviéu, unos 2,8 quilómetros.
Un añu más viella que la fonte de Cuatro Caños, tien una inscripción perllarga
en llatín na que se consigna’l nome del rei Carlos IV, el de Xovellanos figura
perimportante de la cultura y les infraestructures d’Asturies, que xugó un papel enforma
importante pa que s’abriera ésta y otres víes de comunicación. Tamién apaecen los
nomes d’otres personalidaes relixioses y politiques qu’intervinieron de forma activa pa
qu’entamara la vía a furrular.

• La casona:
La Casona Asoleyada con escudu de los Méndez Vigo, restaurada va poco, ye
tamién del sieglu XVII.
Al facese la yá mentada vía ente Xixón y Castiella nel añu 1789, la carretera
dixebró en dos la finca de los Méndez Vigo quedando nun lláu la Casona y nel otru la
Capiya, na que se tuvo prauticando’l cultu relixosu fasta que se fizo la Parroquia de San
Xuan el Bautista de la Corredoria.
Esti nuevu templu fízose nel añu 1962 y dende entós la capiya quedó fuera d’usu
y por decisión del arzobispáu desmontáronse los sillares y treslladáronse p’Avilés, colo
que se perdió un perimportante patrimoniu hestóricu-artísticu de la zona.
• La ponte “Romana”:
Esta ponte medieval denomada ponte romanu o ponte Vieyo que cruza’l ríu
Ñora, perende discurría’l camín antiguu de la costa, ta asitiáu a la vera la depuradora
d’augua de Villaperi.
Pue llegase a él por una carreterina de reciente construcción que va pegada’l ríu
Ñora. Pue accedese camín de Llugones o tamién de Villaperi.
• Los Horros:
L’horru foi y ye aínda una de les principales señes d’identidá cultural d’Asturies
y como tal tan protexíos formando parte del nuesu patrimoniu hestóricu.
Na Corredoria como área rural había gran númberu d’horros, de los cuales namái
se pudieron salvar tres que taben na zona del Conceyín, hoy urbanizada y que foron
treslladaos al Parque de la Cabornia.
Na Corredoria baxa tovía se puen contemplar dalgunos d’estos monumentos nos
sos asitiamientos orixinales.
Al igual que colos caños de la fonte, a nós como equipu pásanos dalgo parecio
colos Horros del Conceyín, que son namái que tres, mentres que nós decidimos
nomanos 4 Horros-La Corredoria, quién sabe si por tradición . . .

• Otres coses:
Amás de too esto tenemos na Corredoria otros llugares d’interés como puen ser
toles fontes de la vera’l Narancu: fonte Felipe, fonte Santa, fonte Cuyences, fonte la
Granxa ... ye perguapu’l paseu del Ñora tamién denomáu “ruta’l colesterol” nes llendes
d’Uviéu y Llugones (Sieru) ...
Pero encamentámosvos a toos a que baxéis pela Corredoria sobre too nel mes de
xunu a les fiestes de San Xuan a pasalo bien y disfrutar de folixa a esgaya, anque ta
claro qu’esa ye otra hestoria que vosotros tenéis de dir escribiendo y ésta escríbese con
ríos de .... “sidra”.
• Planu la Corredoria:
Equí podéis llocalizar tolo citao enantes: