MANAAB' EH AK' Q'ORIK POQOMCHI' Q'ORB'AL

OKB’AL Q’ORIK
Re’ tinamitaal Paxiil Jinaj Amaaq’, re’ kik’acharik wii’ k’ih
tz’uhb’aal, k’ih q’orb’al eh k’ihleeh ruwach qawii’, ruum ajre’,
re’ taqeh q’orb’al rehtalil kiwii’ eh kik’achariik taqeh Qamaam
qati’t re’ xiwih’ik chi ruwach i q’iij saqum, re’ ma’ k’uhleel eh
ma’ sahcheel taj kehtalil.
Re’ taqeh q’orb’al mayab’ kikojarik naq pan chi unchel
ye’aab’ noq majaa’ inokik i kaxlan q’orb’al pan qaxilak. Chi riij
i re’, xooj t’uchwoq ruwach taqeh ye’aab’ aha’ naq kikojarik
wii’ taqeh q’orb’al, ruum reh no’jb’alil taqaab’ re’ iraaj rusacham
ruwach qawii’ eh qaq’orb’al. Ruum wo’ reh rajawriik i kaxlan
q’orb’al, re’ qaq’orb’al k’ahchi’ rujahleem riib’ eh k’ahchi’
rukemeleem taqeh q’orik.
Noq naruye’ariik rajawriik taqeh q’orb’al mayab’
naruye’eem ruq’ab’ chi narukojariiik pan taq chi unchel ye’aab’
je’ rukab’ pan iq’omb’al, Q’atb’al Q’orik, Tijinb’al, pan
puhkq’orik reh ajab’esil Amaaq’. Ruum ajre’ ajwaal ruwach
ruye’riik rajawariik taqeh q’orb’al eh rumiqsjiik taqeh ak’q’orik
re’ qoreel i ak’ b’anooj inb’anarik. Re’ Nim Molaab’ chi riij i
Q’orb’al mayab’ xuyejaa’ i Huuj Manaab’ eh Ak’q’orik
Poqomchi’, re’ taqeh Ak’q’orik wilih xye’janjik re’ q’oreel aha’
narukojariik wii’.
Je’ wo’ chi rupaam i Ak’q’orik xmolarik kiwach taqeh q’orik
re’ ruuk’ sahchinaq chik taqeh. Re’ rub’anariik i kamanik wilih
xkojarik taqeh najtir huuj tz’ihb’amaj chaloq pan kajiq’ob’ haab’.
Reh rukojariik i kehtalil ju’jun chi q’orik, xkojarik reh taqeh q’orik
re’ ruuk’ sahchinaq chik kiwach eh narutohq’iik wo’ chik
rukojariik.