seis poemas galegos - Consello da Cultura Galega

Segunda edición para O Pórtico poético dos Seis poemas galegos
A primeira edición deste estudio sobre os Seis poemas galegos de F.
García Lorca rematábase de imprentar o 27 de Nadal de 1995, xustamente
o mesmo día do sesenta aniversario da edición príncipe, saída do prelo da
Editorial Nós de Ánxel Casal, con prólogo de E. Blanco-Amor.
O libro tivo unha primeira reimpresión no mes de abril de 1996, ano
do centenario de Ánxel Casal, pero tamén recordatorio dos sesenta anos da
inmolación do poeta granadino e do editor dos Seis poemas galegos, ocorrida
fatidicamente o 19 de agosto. Como diría Blanco-Amor, morreron na dura
lex, para que non falase o seu espírito, pola súa voz.
Estes acontecementos propiciaron diversos actos de homenaxe ás súas
figuras. Salientamos, en especial, a reedición facsimilar dos Seis poemas
galegos, coeditada por Ara Solis e mais o Consorcio de Santiago, e a
Exposición gráfico-bibliográfica sobre García Lorca y Galicia, do Grupo
Sargadelos, que percorreu as cidades andaluzas e galegas1 .
Foi un momento moi emotivo para este autor a presentación deste libro,
o 12 de abril de 1996, na que Isidro B. Maiztegui Pereiro, quen chegaba ex
profeso para este acto desde Mar del Plata –Arxentina–, interpretaba ó piano
a música que compuxera para estes poemas, a petición miña. O mestre estivo
acompañado pola moza soprano Marta de Castro, quen cantou os poemas.
1 Sabemos que os Seis poemas galegos seguen a espertar interese literario, aínda hoxe, como
é o caso da recente traducción ó lunfardo polo poeta arxentino Luis Alposta, coa asesoría
lingüística e estudio preliminar de A. Pérez Prado (Ediciones Corregidor, Buenos Aires, 1996).
5