seis poemas galegos - Consello da Cultura Galega

Sabemos que García Lorca leu, ademais, os cancioneiros galego-portugueses.
Coñecía parte da obra de Gil Vicente, Sá de Miranda, Camoens. Dos
escritores galegos, sentía admiración por Rosalía de Castro, afirmada, posiblemente,
polas recomendacións de J. R. Jiménez, lector rosaliano, autor
que deixa nel influencias nos seus primeiros poemas (Libro de poemas, 1921).
Tamén leu a Curros Enríquez, Eduardo Pondal, Amado Carballo, Manuel
Antonio e Eugenio Montes.
García Lorca chega a Galicia, co fardel dos seus coñecementos da cultura
galega, na primavera de 1932, por segunda vez. Reclamárono os Comités
de Cooperación Intelectual da República para dar unhas conferencias.
Primeiramente, é hóspede do Comité vigués, a onde chega o 6 de maio.
Arroupado pola intelectualidade moza da cidade, comparte tertulia no café
Derby. A súa conferencia, no teatro García Barbón, versa sobre «Arquitectura
del cante jondo».
Segue camiño a Compostela13 . A estadía na cidade do Apóstolo ten dúas
fases: antes e despois da súa presencia na Coruña. O día 7, a continuación
dunha visita de cortesía ó Rector da Universidade, dá, pola tarde, a súa conferencia
sobre «Paraíso cerrado para muchos, jardín abierto para pocos (Granada
y su poeta del siglo XVII)», do poeta gongorino Pedro Soto de Rojas
(1584-1658), no salón da Real Sociedad Económica de Amigos del País, instalada
no colexio de San Clemente. Pola noite ten lugar a cea de homenaxe
que os organizadores do acto e a nova intelectualidade universitaria lle
ofreceron no hotel Compostela.
O Comité de Cooperación Intelectual da Coruña invítao tamén a dar
unha confrencia sobre «Arquitectura del cante jondo», no desaparecido teatro
Linares Rivas. Pasa o día 9 na cidade, onde le e comenta fragmentos do
seu libro Poeta en Nueva York.
O día 10 volve a Santiago e posiblemente repite a conferencia sobre
«Arquitectura del cante jondo». De noite os amigos ofrécenlle unha cea íntima
no Bar Viño, na praza do Instituto.
Carlos Martínez-Barbeito, outro dos mellores amigos de Federico
naquelas datas da preguerra segundo Blanco-Amor, con quen tivemos a feliz
oportunidade de revivir aquela viaxe de Lorca a Compostela na súa casa
coruñesa de Juana de Vega, en frecuentes conversas no ano 1994 e 1995,
deixou constancia escrita do seu encontro con García Lorca nun artigo
13
Para esta visita a Santiago, ver Franco Grande e Landeira Yrago, 1974.
21