OBRAS DORS N° 1 de genièr de 1969 ... - Université de Provence

Nòstre Senher demòra amont.
Baisarem de femnas consentas
l'argent dona tot çò qu'òm vòl
e bastirem una mementa
per que se pòrte pas lo dòl.
Monta davala
devinhòla
qual t'aimarà lo primièr
ton còs es la branca fòla
bastarda de l'ametlièr
Dins la nuèit de pèisses roges
tos dets son fuèlhas d'oliu
Dins mon còl espés e roge
rajan d'espinhas e de rius
qual m'a donat la calada
per tirar dins ton vantal
I a una marrida fada
que t'a faita espaurugal
— 6 —
Dançarem ton ventre contra
mas cuèissas e tos sens
espotits dins la susor
de mon pitre a contratemps
Sentirem una òlga mascla
l'enclutge roge del neon
Tustarà sus la musica
a crebar l'acordeon
aurem una set de fluvi
puèi enveja d'un enfant
Dins nòstre còs farà lum
quand dobrirem nòstras mans.
— 7 —
Montavi long del baloard
de las calèlhas rossèlas
mon pas tindava a despart
de mon pè que rabalava
sus lo pont del fluvi, larg
la baranda n'èra freja
Puèi d'un arbre un gost amarg
me lo donèt una fuèlha.
Una dròlla se sarrèt
que me pesèt sus l'espatla
Entre nosautres i aguèt
d'espèras... mal corduradas
de mans mòrtas sens secrèt
e de cambas desnusadas.
— 8 —