Gramática - Academia de la Llingua Asturiana

VII.
El xéneru
y el númberu
92
3.1.3 SUSTANTIVOS NAMÁI EN SINGULAR
Esisten sustantivos que s'empleguen solamente en singular, ente los que
s'alcuentren munchos que faen referencia a conceutos astrautos (probitú,
chapeta, llargor, salú, sede), o a realidaes úniques (norte, sur, sol).
3.2 Terminaciones de singular y plural nos sustantivos y axetivos
Lo mesmo nos sustantivos que nos axetivos, el singular nun presenta formante
carauterísticu.
El formante carauterísticu del plural ufre estes posibilidaes: -S (el ferre /
los ferres), -ES (el llagar / los llagares), -OS (el rapaz / los rapazos) y -NES
(el resume / los resúmenes); hai amalgama col signu léxicu nos casos d'indiferenciación
(el paragües / los paragües).
Respeuto al formante -S, asóciase en dellos casos a cambios vocálicos nel
formante de singular: -U / -OS (el llobu / los llobos), -A / -ES (la casa / les
cases). Respeuto al formante -ES, asóciase a vegaes a la perda d'una -D- del
formante de singular (cansada / cansaes, partida / partíes).
Esti modelu d'espresión del númberu refléxase en sustantivos y axetivos
nes siguientes menes de terminaciones:
a) Singular -U / plural -OS. Exemplos: el llobu, los llobos; l'horru, los
horros; l'enfadu, los enfados; xustu, xustos; señardosu, señardosos. Na
llingua escrita escribiráse siempre «-u» en tolos casos de masculinos singulares,
anque na fala puedan alternar les pronunciaciones [-u] y [-o] (de
toes maneres, escríbese «-o» nunos pocos de sustantivos que s'especifiquen
en II.3.2.4 y en VI.1.2.3). Axústense al mesmu esquema los sustantivos
qu'amuesen estes terminaciones:
-ÁU (o -AU) / -AOS: l'abogáu, los abogaos; el llau, los llaos;
moyáu, moyaos; dau, daos
-ÉU (o -EU) / -EOS: el castañéu, los castañeos; el deu, los deos;
européu, europeos; feu, feos
-ÍU / -ÍOS: el fíu, los fíos; el lladríu, los lladríos; bebíu, bebíos;
galdíu, galdíos
-ÓU (u -OU) / -OOS: el protozóu, los protozoos; el mou, los moos;
tou, toos
-UU / -UOS: l'individuu, los individuos; el residuu, los residuos;
antiguu, antiguos; continuu, continuos; pero la locución
alverbial de contino