Gramática - Academia de la Llingua Asturiana

3
El númberu. Singular y plural
El númberu ye un morfema común a sustantivu y axetivu. La concordancia
de singular o plural per parte l'axetivu ye un puru efeutu del númberu
del sustantivu. Sobre los aspeutos sintácticos de la concordancia de númberu
dientro del grupu nominal, ver XXII.2.3.1 y 3.3; y, na oración atributiva,
XXIV.4.
3.1 Sustantivos en singular y en plural
Como observación de calter xeneral, los sustantivos ufren la posibilidá de
presentase en singular o en plural, acordies coles necesidaes comunicatives
y lligaos dambos númberos a significaciones estremaes; o seya, una
espresión como la casa tien un significáu diferente al de les cases, escoyendo'l
falante dambes posibilidaes según les sos necesidaes.
Sicasí, nun s'usen en plural los nomes propios: Asturies, Uviéu, Nalón,
Europa, Xuan, Olaya, Fernández, etc. Namái ye posible'l plural en delles
espresiones feches: les Asturies d'Uviéu y les Asturies de Santillana; o
cuando se quier destacar los estremaos aspeutos d'una mesma realidá: hai
munchos Uvieos que nun se conocen, el de Casu y el de Llangréu son dos
Nalones diferentes; o cuando s'alude a individuos del mesmu nome: los
Fernández viven en Xixón.
3.1.1 SUSTANTIVOS INDIFERENTES AL NÚMBERU
Dellos sustantivos presenten forma de singular y de plural, pero sin que
se dea nenguna estremación de significáu ente un númberu y otru.
Nestos casos, l'emplegu del singular o del plural ye indiferente cuando
se quier facer referencia a la unidá. Nesta situación tán sustantivos
como: el pantalón o los pantalones, el calzón o los calzones, la tisoria o
les tisories, la tiñaza o les tiñaces, la braga o les bragues, la traza o les
traces, la nariz o les narices, el culiestru o los culiestros, la ñapla o les
ñaples.
3.1.2 SUSTANTIVOS NAMÁI EN PLURAL
Dellos sustantivos empléguense namái en plural. Munchos refiérense a
oxetos formaos por dos partes iguales, anque non siempre ye asina.
Exemplos: les mesories, les morgaces, les fusties, les parigüeles, les angaríes,
les pregancies, les trébedes, les farrapes (nome d'un platu), les papes
(nome d'un platu), les cosques, los rebelgos, los antioyos, etc.
VII.
El xéneru
y el númberu
91