Gramática - Academia de la Llingua Asturiana

VII.
El xéneru
y el númberu
90
terminaciones: masculín -U / femenín -A / neutru -O (llibru malu, novela
mala, carbón malo; home xustu, muyer xusta, xente xusto); masculín -ÁU
/ femenín -ADA / neutru -AO (asientu moyáu, cara moyada, madera moyao;
home enfotáu, muyer enfotada, xente enfotao); masculín -ÍU / femenín -IDA
/ neutru -ÍO (vasu bebíu, xarra bebida, lleche bebío; el cobertor recudíu,
la toballa recudida, la ropa recudío); masculín -UDU / femenín -UDA / neutru
-UDO: (obleru picudu, escarpia picuda, fierro picudo); masculín -ÉU (o
-EU) / femenín -EA / neutru -EO (país européu, nación europea, xente europeo;
gatu feu, gata fea, lo feo); masculín -DERU / femenín -DERA / neutru
-DERO (asuntu facederu, xera facedera, lo facedero; un piescu abrideru,
una ciruela abridera, fruta abridero); masculín -DIZU / femenín -DIZA /
neutru -DIZO (sitiu afayadizu, casa afayadiza, lo afayadizo; neñu antoxadizu,
neña antoxadiza, xente antoxadizo); masculín -ÍN / femenín -INA /
neutru -INO (home vieyín, muyer vieyina, xente vieyino; xatu ruin, oveya
ruina, ganáu ruino); masculín -ÁN / femenín -ANA / neutru -ANO (home
charrán, muyer charrana, xente charrano; rapaz folganzán, rapazana folganzana,
xente folganzano). Sobre la escritura de «d» nestes terminaciones,
ver III.2.3.
2.2.2 AXETIVOS ENSIN ESPRESIÓN ESPECÍFICA DE NEUTRU
Dellos axetivos presenten namái una terminación común a masculín,
femenín y neutru. Nesti casu atópense los axetivos que tienen a comuña
un masculín, un femenín y un neutru en -E (un home llibre, una muyer llibre,
xente llibre; llibru verde, camisa verde, mofu verde), en vocal tónica
(un diputáu zulú, una diputada zulú, xente zulú), en -A (él ye socialista,
ella ye socialista, ye xente socialista) o en consonante (machu xabaz,
fema xabaz, xente xabaz; home bonal, muyer bonal, xente bonal; día
aciar, selmana aciar, eso ye aciar; rapaz pelanes, rapaza pelanes, xente
pelanes).
2.2.3 AXETIVOS CON DOS ESPRESIONES DE NEUTRU
Esiste un tipu d'axetivos qu'amuesen dos posibilidaes de formar el neutru,
una cola mesma espresión que'l masculín, y otra amestándo-y -o. D'esta
miente: masculín -ÓN / femenín -ONA / neutru -ÓN u -ONO (rapaz fartón,
rapaza fartona, xente fartón o fartono; pisu puercón, mesa puercona,
agua puercón o puercono); masculín -ÉS / femenín -ESA / neutru -ÉS o -ESO
(home montés, muyer montesa, xente montés o monteso); masculín -DOR /
femenín -DORA / neutru -DOR o -DORO (rapaz falador, moza faladora, xente
falador o faladoro).