Gramática - Academia de la Llingua Asturiana

Entamu
De magar la so creación pol entós cimeru muérganu políticu del
Principáu d’Asturies, el Conseyu Rexonal, l’Academia de la Llingua
Asturiana quixo llevar alantre con procuru especial ún de los mandaos
estatutarios, de xuru’l que más xustifica per dayuri la nacencia de les academies
llingüístiques a les que se-yos encamienta’l llabor normativu.
Daquella, como agora, teníase perclaro que, amás de les munches estayes
que diben abrise al trabayu onde yera posible la collaboración con dellos
sectores sociales y culturales, había una, la normativa, en que la responsabilidá
cayía dafechu na nueva institución. Foi asina como s’entendió la
xera y d’esa traza ye como se ye a pescanciar que cuando saliere a la lluz,
en 1981, el primer trabayu académicu, llevare’l títulu perelocuente de
Normes ortográfiques y entamos de normalización.
A lo llargo de tou esti tiempu viose que’l primitivu cartafueyu
diba enanchando les sos suxerencies y prescripciones hasta facese, na
cuarta y última edición (reimpresión de 1996), un llibru estimable de 330
páxines. Pero ello yera’l primer pasu. Nes previsiones de l’Academia
habríen dase, darréu, otros dos enantes de considerar que’l ciclu normativu
zarrare la primera faza: la igua d’una gramática y d’un diccionariu de
la llingua. Namái asina podríen toos tar na intelixencia de que l’idioma
asturianu entamaba a tener posibilidaes de mirar, con daqué enfotu, el
futuru. Ye por ello polo qu’hai una década que se vien trabayando con un
perampliu corpus léxicu, no que, albidramos, ha tresformase bien llueu en
Diccionariu académicu. Tamién nesa llinia ye polo que güei, como pasu
intermediu en tol procesu, ufiértase yá la Gramática de la Llingua
Asturiana.
Pal llogru d’esti testu trabayó, n’andecha, la estaya académica de
normalización onde s’inxertaron los académicos Ana María Cano
González, Ramón d’Andrés Díaz (al que se-y encamentó la ponencia) y
Xosé Lluis García Arias. También s’inxirió nella’l Prof. Alfredo Álvarez
Menéndez que, en tou momentu, ufrió la so collaboración valoratible y
desinteresada. Trés años de llargues y continues sesiones, asina como iniciatives
y observaciones d’otros académicos, fixeron posible un pautu de
la institución qu’entiende esta gramática como’l documentu normativu de
más altor y puxu d’ente tolos asoleyaos con rellación a la llingua
d’Asturies.
Morfoloxía
9