Gramática - Academia de la Llingua Asturiana

VII.
El xéneru
y el númberu
88
1.4.1 MASCULÍN Y FEMENÍN CON REFERENCIA A SEXU
Nos nomes de persones y d'animales, la oposición masculín / femenín fai
referencia al sexu, esto ye, a machu y a fema. Exemplos: el cuñáu, la
cuñada; el neñu, la neña; el llobu, la lloba; el pitu, la pita.
Nel casu de los nomes de vexetales y plantes, tamién pue dase la mesma
oposición si esi significáu ta presente na mentalidá del falante: el felechu,
la felecha; el fresnu, la fresna; el carrascu, la carrasca.
Cuando se quier facer una referencia indistinta a machos y femes de la
mesma especie, emplégase davezu'l masculín en singular o en plural: nun
se vio l'osu en tol iviernu; los fíos de Llucía llámense Pedro y Ana; los trabayadores
del comerciu; los drechos del home. Sicasí, en dellos casos ye'l
femenín el que val pal mesmu cometíu: metió les vaques na cuadra, tien
munches oveyes, vieno la raposa.
1.4.2 MASCULÍN Y FEMENÍN CON REFERENCIA A TAMAÑU
N'otros munchos de casos, la oposición de xéneros, en nomes d'oxetos,
refierse a una diferencia de tamaños, como ye'l casu de el furacu, la furaca;
el portiellu, la portiella; el campanu, la campana; el ventanu, la ventana;
el duernu, la duerna; el caleyu, la caleya; el sacu, la saca. Otres
vegaes trátase d'una diferencia de forma, como en el pozu, la poza; el
cestu, la cesta; el paxu, la paxa. Y tamién pue aludir a un matiz diminutivu-peyorativu
aportáu pol masculín, lo que da llugar a novedaes léxiques
surdíes de l'actividá creadora del falante: una chaqueta, un chaquetu; una
camisa, un camisu; una pelota, un pelotu; l'ablana, l'ablanu, etc.
1.4.3 MASCULÍN CON REFERENCIA INDIVIDUAL
Y FEMENÍN CON REFERENCIA COLEUTIVA
Hai abondos casos nos que'l masculín fai referencia al individuu y el femenín
al conxuntu d'esos individuos. Exemplos: el cuernu, la cuerna; el
tuenu, la tuena; el cacíu, la cacía; el vasu, la vasa; el maderu, la madera.
1.4.4 MASCULÍN Y FEMENÍN SIN NENGUNA REFERENCIA
Ye frecuente que la oposición masculín / femenín nun amieste nenguna
diferencia de significáu. Ye lo qu'asocede en casos como éstos: el cacagüés,
la cacagüesa; el lleche, la lleche; el mar, la mar; el mazanal, la
mazanal; el peral, la peral; el pumar, la pumar; el sangre, la sangre.
1.4.5 VARIACIÓN APARENTE DE XÉNERU
A pesar de la so apariencia, sustantivos como los que se citen darréu nun