Gramática - Academia de la Llingua Asturiana

VII.
El xéneru
y el númberu
86
Pela so parte, los sustantivos femeninos asóciense davezu a la terminación
-a. Exemplos: la puerta, la orbayada, la berrida, la carbayeda, la roldana,
la toliña, la rapaza.
Les terminaciones -o, -e, -i y consonante (sacantes los casos mentaos enriba)
lo mesmo s'asocien al masculín qu'al femenín. Exemplos: l'auto, la
mano; el ferre, la llebre; el rei, la llei; el camión, la esmolición; el favor,
la calor; el llagar, la figar; el xarabal, la canal; etc.
De toes maneres, puen atopase esceiciones que contradicen lo dicho.
Asina, hai masculinos qu'acaben en -a: el día, el cura, el problema.
1.2 Axetivos masculinos y femeninos
Pela so parte, los axetivos puen presentase con xéneru variable (masculín
o femenín) en concordancia o referencia a sustantivos del mesmu xéneru.
Pelo xeneral, los axetivos masculinos asóciense nel singular a terminaciones
como -u, -án, -ín. Asina, malu, baxu; manguán, folgán; montesín, avilesín.
Los axetivos femeninos, pel so llau, asóciense xeneralmente nel singular
a la terminación -a: mala, folganzana, avilesina, faladora, etc. Sicasí, hai
axetivos nos qu'esta terminación ye común a los dos xéneros, como en
socialista, egoísta, etc.
El restu de les terminaciones axetives posibles son comunes a masculín y
a femenín: llibre, pelgar, xabaz, pelanes, etc.
1.3 Espresión del xéneru nos sustantivos y axetivos
En llinies xenerales, el xéneru masculín o femenín ofrez los siguientes formantes
morfolóxicos nel singular: -U / -A (llobu, lloba), -U / -DA (moyáu,
moyada; metíu, metida; carbayéu, carbayeda), -E / -A (xastre, xastra) y
-Ø / -A (trabayador, trabayadora). Nos casos de sustantivos y axetivos que
nun presenten diferencies de terminación pal masculín y pal femenín, atópense
dellos morfemes amestaos baxo un mesmu formante o espresión:
atleta, llibre. Darréu especifíquense con más detalle les terminaciones de
xéneru masculín y femenín:
a) Masculín -U / femenín -A. Exemplos: el llobu, la lloba; el neñu, la neña;
el furacu, la furaca; malu, mala; xustu, xusta; mariellu, mariella. Nesti
casu atópense tamién -ÉU (o -EU) / -EA (européu, europea; feu, fea),
-UDU / -UDA (ñarigudu, ñariguda; carnudu, carnuda), -DERU / -DERA (el