Gramática - Academia de la Llingua Asturiana

1
El xéneru
y el númberu
El xéneru. Masculín y femenín
VII
El xéneru ye un morfema común a sustantivu y a axetivu. La concordancia
per parte l'axetivu ye una pura repercusión del xéneru del sustantivu.
Sobre los aspeutos sintácticos de la concordancia de xéneru masculín y
femenín dientro del grupu nominal, puen vese XXII.2.3.1 y 3.3; y na oración
atributiva, XXIV.4.
1.1 Sustantivos masculinos y femeninos
Los sustantivos de la llingua preséntense, pelo xeneral, o en xéneru masculín
o en xéneru femenín, fechu que se comprueba pol artículu y los axetivos
antepuestos dientro'l mesmu sintagma, o polos axetivos pospuestos
atributivos si'l sustantivu ye cuntable: la casa; bona casa, primera casa,
esta casa, dalguna casa, la nuestra casa, otra casa; casa alta, casa vieya,
casa afayadiza, etc. Acordies cola so capacidá pa ufrir variación de xéneru,
los sustantivos puen ser:
a) De xéneru variable: son aquellos que presenten variación de masculín y
femenín. Puen xebrase en dos grupos:
- Los que lleven asociáu un cambiu de significáu según el xéneru (sexu,
tamañu, etc.), como el llobu / la lloba, el furacu / la furaca, el xurista /
la xurista.
- Los que nun lleven asociáu un cambiu de significáu según el xéneru: el
sangre o la sangre, el mar o la mar, el cacagüés o la cacagüesa; el lleche
o la lleche, el cubil o la cubil, el llargor o la llargor.
b) De xéneru invariable o fixu: son aquellos que presenten namái un xéneru,
seya masculín como en el fégadu, el camión, el llimiagu, el llabor,
el sal, el miel, el llume, el sartén, l'ubre, el cal, el gripe; seya femenín
como en la lluna, la vidaya, la formiga, la canal, la calor, l'anfiler, la
pantasma, la ponte, la coñá, la utre, la blima.
En llinies mui xenerales, obsérvase que n'asturianu asóciense al xéneru
masculín los sustantivos que terminen en -u, -án, -ín, -ás y -az. Asina ye
en casos como el furacu, l'abogáu, el xiblíu, el castañéu, el fontán, el
camín, el cabás, el rapaz.
VII.
El xéneru
y el númberu
85