Gramática - Academia de la Llingua Asturiana

interrogativos (¿qué camín?, ¿cuántes vegaes?) y esclamativos (¡qué llaceries!,
¡cuántes allegríes!).
2.3 Gradación del axetivu
La cualidá espresada por un axetivu pue presentase en grau comparativu y
en grau superlativu. Pa llogralo, remánense distintes construcciones sintáctiques.
2.3.1 GRAU COMPARATIVU
Nel grau comparativu, la cualidá del axetivu preséntase en comparanza
con otra que se toma como puntu de referencia. Hai tres menes de comparanza:
la de superioridá, la d'inferioridá y la d'igualdá. Puen atopase más
detalles en XXV.2.3.2.
Na comparanza de superioridá, la cualidá del axetivu preséntase n'intensidá
superior a la del puntu de referencia. Úsase pa ello la construcción
comparativa, iguada cola secuencia más + axetivu + que + referencia.
Exemplos: esti pueblu ye más guapu que'l to, el cielu del atapecer ye más
roxu qu'azul. Nos casos de más bonu y más malu, esta construcción analítica
alterna cola sintética meyor y peor, respeutivamente. Exemplos: un
escritor más bonu qu'él o un escritor meyor qu'él, una ciudá más mala
qu'un pueblu o una ciudá peor qu'un pueblu.
Na comparanza d'inferioridá, la cualidá del axetivu apaez n'intensidá más
baxa que la del puntu de referencia. La construcción usada ye la que respuende
a la secuencia menos +axetivu + que +referencia. Exemplos: el to
perru ye menos blancu que'l de Xuan, esti asuntu ye menos abegosu que los
otros.
Na comparanza d'igualdá, la cualidá del axetivu apaez n'intensidá igual a
la del puntu de referencia. Úsense pa ello secuencies como éstes: tan +
axetivu + como + referencia; axetivu + igual que + referencia; igual de +
axetivu + que + referencia; axetivu + lo mesmo que + referencia; lo mesmo
de + axetivu + que + referencia; etc. Exemplos: esti pueblu ye tan guapu
como'l tuyu, el llibru ye aburríu igual que la película, esa canción ye igual
de vieya que'l baille, Xuan ye altu lo mesmo que Pedro, Xuan ye lo mesmo
d'altu que Pedro.
Al emplegar un numberal multiplicativu, faise alusión implícita o esplícita
a una cantidá que sirve de puntu de referencia. Y asina, si se diz la sidra
tien preciu doble, sobreentiéndese un términu de referencia que nesa ora-
VI.
El nome
y l’axetivu
81