Gramática - Academia de la Llingua Asturiana

VI.
El nome
y l’axetivu
78
a) Esisten nomes de llugar, asturianos y non asturianos, qu'ufren una
forma ensin artículu. Asina, Asturies, Uviéu, Colunga, Tinéu, Ponga,
Gozón, Valdés, Madrid, Arxel, América, etc.
L'artículu con estos topónimos namái ye posible cuando s'empleguen aludiendo
a aspeutos o visiones estremaes de les realidaes a que faen referencia.
De toes maneres, nestos casos l'artículu nun forma parte del topónimu,
sinón del sintagma complexu al que pertenez; poro, l'artículu escribiráse
en lletra minúscula. Exemplos: ésa yera l'Asturies que yo conocí, ye
una novela que reflexa l'Uviéu del cabu'l sieglu, esi llibru fala de la
Lisboa del Renacimientu, etc.
b) Pelo contrario, otros topónimos tienen artículu como parte integrante de
so. Exemplos: L'Arna, L'Aspra, El Baradal, La Barrea, Los Barreros, El
Beyu, La Borbolla, Los Caleyos, La Camoca, La Camocha, El Campu,
La Carrera, Los Carriles, La Carriona, Les Codes, La Colá, La
Corrada, La Corredoria, El Coutu, Los Cuquiellos, La Duz, L'Entregu,
La Espina, Las Estacas, La Felguerina, La Felguera, La Figal, La Foz,
El Freisnu, L'Infiestu, La Pola, La Puela, Les Arriondes, La Madalena,
La Malatería, La Manxoya, La Marea, Las Montañas, El Monte, Las
Morteras, Los Pandos, La Paranza, La Pedrera, La Peral, La Riera, La
Robellada, Los Tacones, Los Turiellos, Lo Seroño, etc.
Ye incorreuto dafechu emplegar estos nomes de llugar ensin l'artículu;
d'esta miente, evitaránse formes como *Barreros, *Camocha, *Duz,
*Felguera, *Entregu, *Infiestu, *Pola, *Arriondes, etc.
Lo mesmo asocede con dellos nomes de fuera les llendes d'Asturies, adautaos
o non al asturianu. Asina, El Salvador, La Plata, El Cairo (y non
*Salvador, *Plata, *Cairo).
c) Habrá tenese en cuenta que n'otros casos l'artículu nun forma parte del
topónimu, sinón que la so presencia débese a tar representando dalgún
sustantivu elidíu: poro, l'artículu escribiráse en lletra minúscula. Asina,
espresiones como el Nalón, l'Urriellu, el Narcea, la Cabruñana, el
Narancu, l'Enol, el Cantábricu proceden de el ríu Nalón, el picu
Urriellu, el ríu Narcea, la cuesta Cabruñana, el monte Narancu, el
llagu Enol.
d) Cuando'l topónimu ye compuestu, l'artículu o l'elementu de rellación
qu'apaez dientro del grupu escribiráse con minúscula: La Faya los
Llobos, Cangues d'Onís, San Esteban de Bocamar, Soto y Agues,
Camín d'ente Matos, etc.