Gramática - Academia de la Llingua Asturiana

V.
L’acentu
68
Convién fixase que n'asturianu les siguientes pallabres nun tienen hiatu,
sinón diptongu: periodu, etiope, austriacu, olimpiada, cardiacu, zodiacu,
etc.
c) Ye norma emplegar l'acentu gráficu siempre nes xuntures ii cuando una
d'elles ye tónica. Nesti casu, l'acentu llántase sobre la vocal tónica:
fiína, Mariína, salíi, apurríi.
d) Nos hiatos de "vocal zarrada tónica + diptongu" (o "diptongu + vocal
zarrada tónica"), tamién se llanta siempre acentu gráficu sobre la vocal
zarrada, como mediu de facer notar l'hiatu. Exemplos: facíeis, uvieínes,
perdíais, fueínos, fueúcos.
e) Nos hiatos de "vocal zarrada + semiabierta o abierta tónica", usaráse l'acentu
cuando asina lo pidan les normes xenerales. Exemplos: afié, fió,
Tiós, pero triar, fiaremos.
3.4 Acentuación de conxuntos de verbu y pronome enclíticu
La xuntanza en decursu d'una forma verbal más un pronome átonu enclíticu
escríbese nuna sola pallabra; ver XXIII.4. Nestos conxuntos síguense
les siguientes normes d'acentuación:
a) Si una forma verbal lleva acentu por sí mesma, consérvalu al amesta-y
ún o dos pronomes átonos, magar qu'al conxuntu resultante nun-y
correspuenda acordies coles normes xenerales d'acentuación.
Exemplos: mandó, mandólu; faláis, faláisme; dicís, dicísnos; facíes,
facíeslo; llevó, llevóvoslo.
b) Cuando se-y amiesta ún o dos pronomes átonos a una forma verbal que
nun tien acentu por sí sola, pondráse-y si'l conxuntu resulta una pallabra
esdrúxula. Exemplos: curia, cúriala; presta, préstame; dixo, díxovos;
falen, fálente; falao, tengo faláote.
c) Nesti sen, y anque non siempre seya asina na pronunciación, a efeutos
d'acentuación el pronome -y cunta siempre como una sílaba. Por exemplu:
quita, quíta-y; da, da-y, dá-yla; fala, fála-y; dan, dan-y, dán-ylo;
apurro, apúrro-y; fecho, tien fécho-y.
3.5 Acentuación d'alverbios en -mente y de pallabres compuestes
Los axetivos o alverbios a los que se-yos amiesta -mente, conserven l'acentu
gráficu si yá enantes lu llevaben. Exemplos: arré, arrémente; foína,
foínamente.