Gramática - Academia de la Llingua Asturiana

IV.
La sílaba
58
c) Tamién s'escriben con «-ll-» interior toles pallabres formaes cola xuntura
de prefixos a pallabres qu'entamen per «ll-» inicial: allunizar, plenilluniu,
billabial, billingüe, collaborar, illegal, prollongar, collateral,
neolliberal, sociollingüística, delliniante, hectollitru, etc.
4.2 Adautación con n- inicial
L'alternancia llibre que se produz nes pallabres patrimoniales ente la n- y
la ñ- iniciales (por exemplu, nuedu o ñuedu, nariz o ñariz) nun se da nes
pallabres d'orixe cultu, que siempre xeneralicen n-. Exemplos: normativu
(non *ñormativu), neuroloxía (non *ñeuroloxía), naufraxu (non *ñaufraxu),
narcisismu (non *ñarcisismu), nucleu (non *ñucleu), etc.
Esto habrá tenese en cuenta mesmamente naquellos cultismos qu'amuesen
una rellación formal clara con dalguna pallabra patrimonial: nome o ñome,
pero nominal (non *ñominal); nublina o ñublina, pero nebulosa (non *ñebulosa),
etc.
4.3 Adautación de s- líquida
La s- líquida, presente nes pallabres cultes, adáutase siempre n'asturianu
anteponiéndo-y una e-. Exemplos: escultura, esfera, esfinxe, espacial,
especial, espectáculu, espíritu, estándar, esquema, esquizofrenia, estadiu,
estatua, estereofónicu, estratexa, estrofa, estructura, estudiu, etc.
4.4 Adautación de grupos consonánticos iniciales de pallabra
Los grupos consonánticos cultos ayenos a les lleis de distribución y combinatoria
asturianes, en xeneral d'orixe griegu, puen caltener o facer desapaecer
el so primer elementu. Exemplos:
gn- ~ n-: gnoseoloxía o noseoloxía, gnomu o nomu, gnósticu o
nósticu, gnosticismu o nosticismu
mn- ~ n-: mnemotéunicu o nemotéunicu
ps- ~ s-: psicoloxía o sicoloxía, psicolóxicu o sicolóxicu, psicoanálisis
o sicoanálisis, psiquiatra o siquiatra, psoriasis o soriasis,
pseudópodu o seudópodu, pseudónimu o seudónimu, pseudoasturianista
o seudoasturianista
pt- ~ t-: ptolemaicu o tolemaicu, pterodáctilu o terodáctilu, pterosauriu
o terosauriu
Sicasí, los cultismos qu’entamen orixinariamente per pn- desanicien regularmente
la primera consonante: neumáticu, neumoloxía, neumonía.