Gramática - Academia de la Llingua Asturiana

IV.
La sílaba
56
Pero l'emplegu de la llingua asturiana nos ámbitos académicos, lliterarios,
científicos, téunicos y formales de toa mena, fai necesariu l'emplegu de
cultismos, esto ye, pallabres d'orixe cultu o eruditu, que permiten l'accesu
de la llingua a tou tipu d'espresión. Nes llingües europees de cultura, ye
tradición que los cultismos seyan tomaos direutamente del llatín y del
griegu clásicos y, más modernamente, tamién d'idiomes de gran cultivu lliterariu,
como l'inglés y el francés.
Les pallabres d'orixe cultu nun entren necesariamente nel asturianu cola
mesma grafía que tienen nes llingües d'orixe, sinón que se puen adautar a
les peculiaridaes morfolóxiques y fonolóxiques de la llingua. Darréu d'ello,
eses pallabres puen considerase tan asturianes como les d'orixe patrimonial
o popular; la so presencia, de toes maneres, xustificaráse cuando'l
so insertamientu na llingua seya necesariu.
Abondos cultismos nun presenten nenguna dificultá de mena fonolóxica
p'adautase al asturianu, pues amuesen les peculiaridaes d'esta llingua;
éstos namái s'axusten a les peculiaridaes morfolóxiques de la llingua. Esti
ye'l casu de pallabres como idénticu, idéntica, idéntico, idénticos, idéntiques;
hipérbole, hipérboles; teléfonu, teléfonos; sistema, sistemes; patriarca,
patriarques; democráticu, democrática, democrático, democráticos,
democrátiques; economía, economíes; hidrólisis; átomu, átomos; xenuín,
xenuina, xenuino, xenuinos, xenuines; bizantín, bizantina, bizantino, bizantinos,
bizantines; presidente, presidenta, presidentes; colesterol; albín,
albina, albino, albinos, albines; etc.
Pero permunchos cultismos sí presenten carauterístiques fonolóxiques
ayenes al sistema asturianu. D'esta miente, la so entrada na llingua non
solo pide una adautación morfolóxica, sinón tamién fónica y fonolóxica.
4.1 Adautación con ll o l
4.1.1 ADAUTACIÓN CON LL- O L- INICIAL
Les pallabres d'orixe cultu adáutense al asturianu con «ll-» o con «l-» iniciales
según dellos criterios que s'especifiquen darréu:
a) Acordies con vieyes tendencies de la llingua, entá vives na población
falante, ye vezu que la «l-» inicial de les pallabres d'aniciu cultu s'adaute
como /l/ «ll». Esta adautación xustifícase en munchos casos pola
rellación formal clara del cultismu cola correspondiente pallabra patrimonial
asturiana; asina, llingüística, en rellación con llingua, llunar en
rellación con lluna, etc.