Gramática - Academia de la Llingua Asturiana

IV.
La sílaba
52
a) Ye tendencia xeneral de la llingua que los diptongos tónicos ue, ie se
correspuendan coles vocales o, e en sílabes átones de pallabres derivaes
o rellacionaes. Asina, nueche, pero nocherniegu; pescuezu, pero pescozada;
fueu, pero foguera; puercu, pero porquizu; cuetu, pero cotarón,
cotayu; puerta, pero portón, portiella; yo amagüesto, pero amagostar;
yo cueyo, pero coyer; culiebra, pero culebrizu; fierro, pero ferruñosu;
piescu, pero pescal; él amiesta, pero amestar; ellos enriestren, pero
enrestrar; tu pieslles, pero pesllar; miel, pero meleru; etc.
b) Tendencia tala vese amenorgada nos derivaos colos sufixos productivos
-ín, -ón, -ucu y -acu. Nestos casos, el diptongu suel caltenese en sílaba
átona; ver II.3.1.1 y 3.1.3. Exemplos: fierro, fierrín, fierrón, fierrucu,
fierracu; tierra, tierrina, tierrona, tierruca, tierraca; pueblu, pueblín,
pueblón, pueblucu, pueblacu; nueche, nuechina, nuechona, nuechuca,
nuechaca; puercu, puerquín, puercón, puercucu, puercacu; cuetu, cuetín,
cuetón, cuetucu, cuetacu; puerta, puertina, puertona, puertuca,
puertaca; etc.
2.2 Triptongos
Un triptongu produzse cuando un conxuntu de tres vocales s'atopa na
mesma sílaba. Los triptongos siempres s'axusten al esquema vocal zarrada
(marxe) + vocal semiabierta o abierta (nucleu) + vocal zarrada (marxe).
Los triptongos n'asturianu son éstos: iai, iei, ioi, iau, ieu, uai, uei, uau, ueu.
Exemplos: allampiáis, estropiéis, dió-ylu, ariciáu, mieu, acentuái, güei,
acentuáu, llueu, etc. Si tres vocales xuntes nun s'atopen na mesma sílaba,
dizse tamién qu'hai hiatu: antroxaríeis, fueín.
2.3 Hiatos
Hiatu ye una secuencia de vocales que nun s'atopen na mesma sílaba,
sinón que se dixebren en sílabes estremaes. Hai tres menes d'hiatu:
a) Hiatu producíu por una secuencia de dos vocales medies o abiertes.
Al nun se cumplir el requisitu de la presencia d'una vocal zarrada, caúna
de les dos vocales allúgase en sílabes estremaes. Nesti casu tán les secuencies
ae, ao, ea, eo, oa, oe, ee, oo. Exemplos: paez, moyao, teatru, peor, toa,
coeficiente, enfeemos, too.
Lo mesmo apuerta si una de dambes vocales forma diptongu con otra tercera.
Trátase de secuencies como a-ei, a-eu, e-ai, e-au, e-ei, e-oi, o-ai, oau,
etc., y n'orde inversu, ia-e, ia-o, ie-o, ua-e, ua-o, ue-a, ue-o, etc.