Gramática - Academia de la Llingua Asturiana

2.11 Lletres «r» y «rr»
Na escritura de la lletra «r» y del dígrafu «rr» siguiránse les normes
siguientes:
a) Lletra «r».
Emplégase nestos casos:
- Al entamar una pallabra: rocea, roxu, reya, Ranón.
- Tres de les lletres «n», «l» y «s»: vienres, tienru, xenru, alredor, esriñonar,
Israel.
- Nos grupos consonánticos pr, tr, cr, br, dr, gr, fr y zr. Exemplos: prunu,
trabe, cruz, bracu, drechu, granu, frayar, zreza.
- En final de sílaba o de pallabra: parllar, torgar, unviar, coyer.
- Ente vocales, cuando representa'l fonema /r/: caru frente a carru, fora
frente a forra, númberu, xera, quieren.
b) Dígrafu «rr».
Namái s'emplega ente vocales y dientro d'una mesma pallabra, pa
representar el fonema /r- /. Exemplos: carru frente a caru, forra frente a
fora, cuerria, horru, purrela.
2.12 Lletra «h»
La lletra «h», que nun representa nengún fonema, emplégase nos casos en
que tea xustificao pola etimoloxía de la pallabra y s'afite na tradición escrita.
Asina, home, humanu, hachu, haber, herba, hermanu, heredar, hestoria,
húmedu, humildar, horru, hipertensu, héliz, holograma, alcohol,
mahometanu, etc. Asina entós, la lletra «h» enxamás s'usará en pallabres
como artu, umeru, erbía, Eres y otres. Sobre l'emplegu de la lletra «h.», ver
I.1.2.2.
3
Perda de consonantes
Na cadena falada, especialmente na conversación rápida, fórmense delles
secuencies de consonantes onde una pue desaniciase de la pronunciación.
Asina, por exemplu, los xatos, les saques o pites roxes pronúnciense davezu
suprimiendo la [-s] final de la primera pallabra: "loxatos", "lesaques",
"piterroxes"; pero normalmente estos fenómenos de perda de consonantes
nun tienen nengún reflexu na escritura.
III.
Les consonantes
49