Gramática - Academia de la Llingua Asturiana

III.
Les consonantes
46
«i». Exemplos: falagueru (pero falagar), guetar, guirriu, miaguíu (pero
miagar), colungués (pero Colunga), xigues (pero xiga), etc.
2.5 Lletra «g» ante diptongu
Los diptongos /ua, ue, ui, uo/ enxamás entamen sílaba. Les secuencies /g/
+ /ue/, /g/ + /ui/ escríbense con diéresis: guapu, guante, ¡guo!, güesu,
güevu, güertu, güestia, güeyu, güel, cacagüés, güitu, güisqui, agüina,
Güerces, Güerna, etc.
2.6 Lletres «c» y «z»
a) Lletra «c».
La lletra «c» representa'l fonema consonánticu /θ/ cuando-y siguen les
vocales /e/ o /i/. Exemplos: ceguñar, cirigüeña, cirolar, entemecer,
rapaces, xacíu.
b) Lletra «z».
- La lletra «z» representa siempre'l fonema consonánticu /θ/, seya siguida
de vocal (zapicu, faza, tarrezo, zuna), en final de sílaba o de pallabra
(mozcar, paez, llimaz) o nel grupu «zr» (zreza, zrezal, alcazre).
- Como norma de calter xeneral, la lletra «z» nun s'emplegará ante «e»,
«i». Exemplos: rapaza, pero rapaces (non *rapazes); tarrezo, pero
tarreces (non *tarrezes); llimaz, pero llimacín (non *llimazín); etc.
2.7 Lletra «x»
La lletra «x» ye representación del fonema / s/. La secuencia «xi» namái
s'escribe cuando'l fonema /i/ ye centru silábicu, lo qu'asocede cuando
vocal tala apaez siguida d'una consonante (ruxir, xiblar, roxín), en final
absoluta (fuxi) o siguida de vocal y n'hiatu con ella (coruxía, coruxiona
«coruxía grande», ruxíen, aflixíu, texíes, arqueloxía, teoloxía). Téngase en
cuenta la grafía d'estes pallabres d'orixe cultu: anorexa, asfixa, complexón,
crucifixón, galaxa, papiroflexa, reflexón, axoma.
Nel restu de los casos escribiráse siempre «x»: xana, non *xiana; roxu,
non *roxiu; xorra, non *xiorra; Xixón, non *Xixión.
La lletra «x» tamién pue apaecer n'otres pallabres d'orixe cultu, como léxicu,
taxi, xenofobia, etc.
2.8 Lletres «x» y «s»
Habrá tenese cuidáu de nun confundir estes dos lletres nin los fonemes