Gramática - Academia de la Llingua Asturiana

Magar que nun respuenden a les carauterístiques de les construcciones
comparatives, amuesen tamién conteníu d'igualdá:
- Axetivu + sustantivu alverbializáu u oración alverbializada por como.
Exemplos: una rapaza alta como Marta, el nietu ye neciu como me dixeron.
- Alverbiu + sustantivu alverbializáu u oración alverbializada por como.
Exemplos: fai les coses apriesa como'l xefe, la to casa ta lloñe como ta
la cabaña.
- Lo mesmo + de + axetivu alverbializáu + sustantivu alverbializáu u oración
alverbializada por que. Dambos sintagmes alverbiales funcionen
como subordinaos de lo mesmo. Exemplos: una rapaza lo mesmo d'alta
que Marta, el nietu ye lo mesmo de neciu que dicíen toos.
- Igual + de + axetivu alverbializáu + sustantivu alverbializáu u oración
alverbializada por que. Tien les mesmes carauterístiques que l'anterior.
Exemplos: una rapaza igual d'alta que Marta, el nietu ye igual de neciu
que dicíen toos.
- Lo mesmo + de + alverbiu + sustantivu alverbializáu u oración alverbializada
por que. Exemplos: fai les coses lo mesmo d'apriesa que les fai'l
xefe, la to casa ta lo mesmo de lloñe que ta la cabaña.
- Igual + de + alverbiu + sustantivu alverbializáu u oración alverbializada
por que. Amuese les mesmes carauterístiques que l'anterior. Exemplos:
fai les coses igual d'apriesa que les fai'l xefe, la to casa ta igual de lloñe
que ta la cabaña.
B) COMPARATIVES DE NUMBERALES FRACCIONARIOS
Los numberales fraccionarios y los multiplicativos puen exercer funciones
propies d'alverbiu. Nesti usu alverbial, puen apaecer espresando un
valor absolutu: el xatu val la metá, agora l'alquiler cuéstate un terciu.
Pero puen afitar una comparanza con un subordináu alverbializáu que fai
de referencia: el xatu val la metá que'l corderu, la metá que l'añu pasáu,
la metá de lo que val el corderu; agora l'alquiler cuéstate un terciu que
l'añu pasáu.
El fraccionariu alverbial pue acompañase d'un sustantivu alverbializáu,
referíu a aquello que se divide, precedíu de de: el xatu val la metá de dineru
que'l corderu, agora l'alquiler cuéstate un terciu de dineru que l'añu
pasáu.
Tamién pue acompañase d'un axetivu alverbializáu o d'un alverbiu, al
envís d'espresar la cualidá o la magnitú que se divide: el fíu ye la metá de
bonu que'l pá, el to pueblu ta la quinta parte de lloñe que'l míu.
XXV.
Oración
compuesta
y oración
complexa
391