Gramática - Academia de la Llingua Asturiana

XXV.
Oración
compuesta
y oración
complexa
390
• Comparatives d'inferioridá.
Indiquen que de los dos términos rellacionaos ún tómase nun grau o nuna
intensidá menor qu'otru. Les comparatives d'inferioridá adopten estremaes
construcciones:
- Axetivu subordináu menos + sustantivu alverbializáu por que. Exemplu:
conoz menos chigres que toos nós.
- Nucleu sustantivu menos + sustantivu alverbializáu por que. Exemplu:
conoz a menos que toos nós.
- Alverbiu subordináu menos + axetivu + sustantivu alverbializáu por que.
Exemplos: una rapaza menos alta que Marta, el nietu ye menos neciu
que'l güelu.
- Alverbiu subordináu menos + alverbiu + sustantivu alverbializáu por
que. Exemplos: fai les coses menos apriesa que'l xefe, la to casa ta
menos lloñe que la cabaña.
- Nucleu alverbial menos + sustantivu alverbializáu por que. Exemplu:
fala menos que'l pá.
• Comparatives d'igualdá.
Indiquen que los dos términos rellacionaos tómense nel mesmu grau o
intensidá. Les comparatives d'igualdá adopten estremaes construcciones:
- Axetivu subordináu tantu -a -o + nucleu sustantivu + sustantivu alverbializáu
u oración alverbializada por como. Exemplos: comimos tantes
mazanes como vosotros, vinieron tantos turistes como dixeran pela
radio.
- Nucleu sustantivu tantu -a -o + sustantivu alverbializáu u oración alverbializada
por como. Exemplos: comimos tantes como vosotros; vinieron
tantos como dixeran pela radio.
- Alverbiu subordináu tan + axetivu + sustantivu alverbializáu u oración
alverbializada por como. Exemplos: una rapaza tan alta como Marta
(tan alta como ye Marta), el nietu ye tan neciu como'l güelu (tan neciu
como paez).
- Alverbiu subordináu tan + alverbiu + sustantivu alverbializáu u oración
alverbializada por como. Exemplos: fai les coses tan apriesa como'l xefe
(tan apriesa como-y peta), la to casa ta tan lloñe como la cabaña (tan
lloñe como dixeron).
- Nucleu alverbial tanto + sustantivu alverbializáu u oración alverbializada
por como. Exemplos: fala tanto como'l pá, trabayen tanto como
dicen.