Gramática - Academia de la Llingua Asturiana

Queden convertíes n'alverbios en función de complementu circunstancial
aquelles oraciones de mano sustantivaes por que y precedíes de preposiciones
diverses; nun s'escaeza que secuencies como porque, desque, pa
que y otres asemeyaes nun son conxunciones, sinón oraciones trespuestes
sustantives precedíes de preposición. Exemplos: yo nun llego a que m'insulten
d'esi mou, confundió eses coses con que queríen matalu, dende que
vos vio foi allegrando l'aspeutu, nun pongo nengún enfotu en que nos
digan la verdá, ente que queríen volver y que queríen marchar pasónos la
tarde, mercó dellos carambelos pa que'l neñu dexara de berrar, entrastis
ensin que vos vieren. Nesti sen, convién nun confundir la secuencia con
que cola qu'apaez en nun había naide, conque marché (conxunción consecutiva
qu'enllaza dos oraciones coordinaes).
2.3.2 ORACIONES COMPARATIVES
Les comparatives constitúin una mena de construcción nominal formada
con un sustantivu o axetivu tantu -a -o, o bien con un alverbiu más, menos
o tanto ~ tan (nucleu de sintagma o términu subordináu d'un axetivu o d'otru
alverbiu), del que depende como subordináu una oración trespuesta a
alverbiu por que o como, na que davezu apaez elidíu'l verbu.
A) COMPARATIVES CUANTITATIVES
Acordies col so conteníu, puen ser comparatives de superioridá, d'inferioridá
y d'igualdá.
• Comparatives de superioridá.
Indiquen que de los dos términos rellacionaos ún tómase nun grau o nuna
intensidá mayor qu'otru. Les comparatives de superioridá adopten estremaes
construcciones:
- Axetivu subordináu más + sustantivu alverbializáu por que. Exemplu:
vinieron más turistes que l'añu pasáu.
- Nucleu sustantivu más + sustantivu alverbializáu por que. Exemplu:
vinieron más que l'añu pasáu.
- Alverbiu subordináu más + axetivu + sustantivu alverbializáu por que.
Exemplos: una rapaza más alta que Marta, el nietu ye más neciu que'l
güelu.
- Alverbiu subordináu más + alverbiu + sustantivu alverbializáu por que.
Exemplos: fai les coses más apriesa que'l xefe, la to casa ta más lloñe
que la cabaña.
- Nucleu alverbial más + sustantivu alverbializáu por que. Exemplu: trabaya
más que'l xefe.
XXV.
Oración
compuesta
y oración
complexa
389