Gramática - Academia de la Llingua Asturiana

contestu. Exemplos: el rei que meyor gobernó'l país yera estranxeru ’ el
que meyor gobernó'l país yera estranxeru; la delegada que faló ayeri
dimitió va dos hores ’ la que faló ayeri dimitió va dos hores; el dineru
que teníen aforrao fundiéronlo yá ’ lo que teníen aforrao fundiéronlo yá.
Que ensin antecedente pue dir precedíu de preposición, indicando la función
qu'exerce la oración de relativu dientro la oración principal.
Exemplos: nun llamaron al que-y baxaron el sueldu (complementu direutu),
ficiéron-y la vida imposible al que-y baxaron el sueldu (complementu
indireutu), quéxense del que nun trabaya (suplementu), veníen falando
cola que-yos dio la noticia (complementu circunstancial).
2.2.4 SINTAXIS DEL RELATIVU QUIEN
El relativu quien con antecedente pue cumplir dientro la oración axetiva
estes funciones:
- Complementu direutu (con preposición a): falaron col mineru a quien
vimos picando na rampla.
- Complementu indireutu (con preposición a): premiaron al soldáu a
quien pidimos ayuda.
- Suplementu (con preposiciones diverses): el funcionariu de quien se quexaben
yera bien repunante, l'amiga en quien s'enfotó Alicia nun foi lleal.
- Complementu circunstancial (con preposiciones diverses): pue xulgame
l'autoridá ante quien toi; la direutora, con quien falé ayeri, va iguanos
el casu.
Quien con antecedente nun pue exercer funciones nin de suxetu léxicu nin
d'atributu.
Magar que l'emplegu de quien con antecedente ye posible –acordies colo
que se ve nos exemplos d'enriba–, lo cierto ye que la fala popular prefier
neses mesmes circunstancies l'emplegu de les construcciones formaes por
artículu y que. Asina, los exemplos vistos queden: falaron col mineru al
que vimos picando na rampla; premiaron al soldáu al que pidimos ayuda;
el funcionariu del que se quexaben yera bien repunante; l'amiga na que
s'enfotó Alicia nun foi lleal; pue xulgame l'autoridá ante la que toi; la
direutora, cola que falé ayeri, va iguanos el casu.
2.2.5 QUIEN ENSIN ANTECEDENTE
Nestes circunstancies, quien convierte una oración en sustantivu; equival
entós a la construcción d'artículu y que: quien la fai págala o el que la fai
págala.
XXV.
Oración
compuesta
y oración
complexa
385