Gramática - Academia de la Llingua Asturiana

XXV.
Oración
compuesta
y oración
complexa
384
antecedente, esplicando dalgún trazu del que, pel contestu, puen entendese
valores circunstanciales, como causa, condición, etc. Por exemplu,
en los socios, que quieren dir d'escursión, apuntáronse na secretaría
entiéndese que tolos socios quieren dir d'escursión.
Les relatives esplicatives estrémense tamién de les especificatives en qu'apaecen
xebraes del restu del enunciáu per aciu de pauses, reflexaes na
escritura con comes.
2.2.1 FUNCIONES DE QUE DIENTRO LA ORACIÓN TRESPUESTA
El relativu que pue cumplir dientro la oración axetiva estes funciones:
- Suxetu léxicu: les fueyes que cayeron del árbol.
- Complementu direutu: el llibru que lleí prestóme.
- Complementu indireutu (con preposición a): esi ye'l trabayador al que
baxaron el sueldu.
- Suplementu (con preposiciones variaes): el problema del que se quexaben
yera bien abegosu, l'amiga na que s'enfotó Alicia nun foi lleal.
- Complementu circunstancial (con preposiciones variaes): ehí ta la fesoria
cola que sallé les pataques, el pueblu pal que voi llámase L'Agüeria.
- Atributu: nun sabéis bien lo difícil que ye.
2.2.2 QUE PRECEDÍU DE PREPOSICIÓN
La secuencia de preposición, artículu y que sustitúise davezu por una
construcción onde que apaez solu, mentanto la función conseñada pola
preposición esprésase agora por un pronome átonu o por un sintagma de
preposición y pronome tónicu. Asina, por exemplu, oraciones como esi
ye'l trabayador al que baxaron el sueldu, el problema del que se quexaben
yera bien abegosu, l'amiga na que s'enfotó Alicia nun foi lleal, ehí ta
la fesoria cola que sallé les pataques, el pueblu pal que voi llámase
L'Agüeria son d'aconseyar muncho más qu'otres como les que siguen
darréu, consideraes non correutes: *esi ye'l trabayador que-y baxaron el
sueldu, *el problema que se quexaben d'él yera bien abegosu, *l'amiga que
s'enfotó Alicia nella nun foi lleal, *ehí ta la fesoria que sallé con ella les
pataques, *el pueblu que voi (pa él) llámase L'Agüeria.
2.2.3 QUE ENSIN ANTECEDENTE
Cuando la oración axetiva encabezada por que apaez ensin antecedente, ye
obligada la presencia del artículu, elementu que convierte a la oración axetiva
(oración de relativu) nuna oración sustantiva. L'artículu amuesa'l
xéneru y el númberu del elementu nominal al que se refier en testu o en