Gramática - Academia de la Llingua Asturiana

2.1 Oraciones trespuestes sustantives
La tresposición nestos casos puen realizala: la conxunción subordinativa
que; el si completivu; los interrogativos indireutos qué, quién, cuál ~
cuálu, cuántu (coles sos variaciones de xéneru y númberu), cómo, cuándo,
ónde, ú ~ aú; los relativos quien y cuantu ensin antecedente; y l'estilu
indireutu.
La oración asina trespuesta ye a exercer les funciones propies del sustantivu.
Asina, suxetu léxicu (que, con valor estilísticu, pue permitir l'usu del
artículu): (el) que nun seya asina esmolezme bastante, si fales o non nun
ye cosa de mio, (el) qué-yos dixo tien muncha importancia, (el) cómo llogró
pasar la frontera ye bien misterioso. Tamién, complementu direutu:
que nun ye asina sábeslo tu, nun m'aclarió si les coses van bien pel pueblu,
nun sabemos cuánto nos val esa pieza; complementu indireutu: nun-
-y quito méritu a qu'aguanten tantu tiempu ensin fumar, nun-y doi importancia
a si vienen o non, nun-y deas importancia a ónde puedan dir; y
suplementu: falaron de que la collecha anguaño pue dir mal, quexámonos
de quién anda diciendo esos bilordios per ende.
Ha alvertise que, en tou casu, nun ye posible tresponer una oración a sustantivu
ensin conxunción: ruégote que vengas aína, encamiéntovos que lo
faigáis con procuru (non *ruégote vengas aína, *encamiéntovos lo faigáis
con procuru).
Les oraciones trespuestes a sustantivu puen, pela so parte, sufrir una nueva
tresposición a axetivu, de manera que son a exercer la función de subordináu
sustantivu, davezu gracies a la preposición de. Exemplos: el problema
de que nun seya asina almítenlu toos, la dulda de si les coses van bien
o non vamos tenela munchu tiempu, nun quier ver la importancia de qué-
-yos dixo, el misteriu de cómo llogró pasar la frontera entá nun lu descubrió
la policía, etc.
2.2 Oraciones trespuestes axetives o de relativu
Les oraciones trespuestes a axetivu por un relativu puen ser de dos menes:
a) Relatives especificatives. Faen referencia a una parte de lo espresao pol
antecedente. Asina, por exemplu, en los socios que quieren dir d'escursión
apuntáronse na secretaría, entiéndese que non tolos socios quieren
dir d'escursión, sinón una parte d'ellos.
b) Relatives esplicatives. Faen referencia al conxuntu de lo espresao pol
XXV.
Oración
compuesta
y oración
complexa
383