Gramática - Academia de la Llingua Asturiana

XXV.
Oración
compuesta
y oración
complexa
382
ya, nin; la dixuntiva o, y la construcción o bien... o bien; les adversatives
pero, mas, sinón que, anque; y les consecutives conque, de mou que (y
asemeyaes), asina que. Exemplos: diben a la mar pela mañana, pasaben
tol día pescando y amarraben pela nueche; nun llueve nin fai sol; ¿llueve
o fai sol?; o bien s'amurnia o bien s'allegra; ye un llibru caru, pero merez
la pena mercalu; nun-y gusten les sardines, sinón que-y gusten los bocartes;
ye guapu, anque ye daqué fatu; aburriéronse al minutu de tar ellí,
conque colaron a otru sitiu; perdiera'l reló, de mou qu'entrugó-y la hora
a la señora d'al llau; ficísti-y dañu, asina que pídi-y perdón.
En dellos casos, el valor coordinante de la conxunción apaez reforzáu por
un alverbiu de xuntura: traxo mazanes, peres y, amás, figos; ye mui bona
rapaza, pero, sicasí, nada inxenua.
Cuando les oraciones coordinaes son tres o más, les conxunciones y ~ ya
y o puen enllazar namái les dos últimes oraciones o bien toes elles, lo que
vien a amestar dél valor espresivu. Exemplos: glayen, canten, palmien y
xirínguense / glayen y canten y palmien y xirínguense; fregamos la cacía,
barremos el suelu o llavamos la ropa / fregamos la cacía o barremos el
suelu o llavamos la ropa.
Pela so parte, la conxunción nin enllaza oraciones negatives, siendo amás
sustitutu de la negación nun naquelles oraciones que queden precedíes por
ella. Pue apaecer ente les dos últimes (nun fala, nun llee nin escribe), ente
toes elles (nun fala nin llee nin escribe), y mesmamente entamando tola
secuencia (nin fala nin llee nin escribe).
2
Oración complexa
Ye oración complexa aquella que tien dientro sí otra u otres tresformaes
(trespuestes) en sustantivu, axetivu o alverbiu y faciendo funciones d'inferior
xerarquía que la del nucleu oracional. Asina, por exemplu, María
sabía que l'hermanu taba en casa ye una sola oración con un nucleu sabe,
un suxetu léxicu María y un complementu direutu (l'hermanu taba en
casa), que nesti casu ta exercíu por una oración convertida en sustantivu
per aciu del trespositor que. Considérense tamién oraciones complexes
aquelles nes qu'una oración trespuesta entra en rellación d'interdependencia
con un elementu d'otra oración na que ta insertada; ye lo qu'asocede
coles construcciones consecutives que se ven en XXV.2.3.3.