Gramática - Academia de la Llingua Asturiana

Cuando esti atributu ye axetivu, concuerda en xéneru y númberu col suxetu
o col complementu direutu. Exemplos: el direutor faló seriu a los
emplegaos, la direutora faló seria a los emplegaos, los direutores falaron
serios a los emplegaos, les direutores falaron series a los emplegaos, la
xente faló serio a los emplegaos; unviastis selláu'l sobre, unviastis sellada
la carta, unviastis sellaos los sobres, unviastis sellaes les cartes,
unviastis sellao lo que vos dixi.
Cuando esti atributu se da por consabíu en contestu, tien dos posibilidaes:
o bien nun dexa nenguna seña, o bien dexa como niciu l'alverbiu asina: el
mozu escucha'l cantar asina o el mozu escucha'l cantar, Xuan lleva asina
les caxes o Xuan lleva les caxes, el direutor faló asina a los emplegaos o el
direutor faló a los emplegaos, unviastis asina la carta o unviastis la carta.
3.2 Sustantivu en función d'atributu del suxetu o del complementu
direutu
Cuando esti atributu ye sustantivu, concuerda en xéneru y númberu col
suxetu o col complementu direutu, según correspuenda: escoyeron secretariu
al vecín / escoyeron secretaria a la vecina / escoyeron secretarios a
los vecinos / escoyeron secretaries a les vecines.
Nesti casu'l sustantivu pue dir precedíu d'elementos como de, como o por.
Exemplos: escoyeron como secretariu al vecín, escoyeron de secretariu al
vecín o escoyeron secretariu al vecín; nomen como direutor al más vieyu,
nomen de direutor al más vieyu o nomen direutor al más vieyu. Otres vegaes,
sin embargu, la presencia de los mentaos elementos ye obligada: dirixóse
al pueblu como diputada, tengo al direutor por home seriu, la so fía
trabaya d'emplegada.
4
Concordancies del atributu
4.1 Concordancia de númberu y xéneru
Como yá se dixo, cuando l'atributu ye un axetivu establezse concordancia
ente'l términu principal (suxetu léxicu o complementu direutu) y l'atributu.
Esta concordancia ye, en primer llugar, de singular frente a plural: el llibru
ye caru, dalguna casa ta esbarrumbada, tien enllena la caxa; los llibros
son caros, dalgunes cases tán esbarrumbaes, tien enllenes les caxes.
Una esceición notable ye aquella onde un suxetu en singular concuerda
XXIV.
Les oraciones
atributives
375