Gramática - Academia de la Llingua Asturiana

4.5 Allugamientu con complexos verbales
Nel casu de los complexos verbales (conxuntos de dos verbos funcionando
como ún, seyan perífrasis o non), l'allugamientu pronominal básicu
obliga al pronome, nunos casos, a allugase enclíticu al segundu verbu
(puen facelo); n'otros, pue insertase ente dambos verbos (tien quexáose o
tiense quexao). La presencia d'un factor proclíticu fai posible estremaos
allugamientos. Asina, puen mentase casos como los que siguen darréu:
a) Nun inflúi la presencia del factor proclíticu. Exemplos: cansemos de
picate al timbre / nun cansemos de picate al timbre; naguaben por saludales
/ nun naguaben por saludales; necesites vendelos / nun necesites
vendelos; pensé en facelo / nun pensé en facelo.
b) El factor proclíticu permite que'l pronome s'allugue indistintamente
enclíticu o proclíticu a tol complexu verbal. Exemplos: voi vendé-yosles
/ nun voi vendé-yosles o nun-yos les voi vender; tamos faciéndolos
de menos / nun tamos faciéndolos de menos o nun los tamos faciendo
de menos; acaben de dalo pela radio / nun acaben de dalo pela radio
o nun lo acaben de dar pela radio; dexarán d'afalagate / nun dexarán
d'afalagate o nun te dexarán d'afalagar; mandaron llantalos embaxo /
nun mandaron llantalos embaxo o nun los mandaron llantar embaxo;
pue sese lo qu'ún quiera / nun pue sese lo qu'ún quiera o nun se pue ser
lo qu'ún quiera; ¿yes a comelo? / ¿nun yes a comelo? o ¿nun lo yes a
comer?
c) Allugamientu básicu detrás del complexu verbal o ente medies de dambos
verbos: col factor proclíticu, el pronome pue dir n'enclisis o proclisis
al complexu verbal, pero non ente medies. Exemplos: tien quexáose
muncho o tiense quexao muncho / nun tien quexáose muncho o nun se
tien quexao muncho. Pero non *nun tiense quexao.
d) Allugamientu básicu detrás del complexu verbal o ente medies de dambos
verbos: col factor proclíticu son posibles tolos allugamientos.
Exemplos: tengo que mandávosles o tengo que vos les mandar / nun
tengo que mandávosles o nun tengo que vos les mandar o nun vos les
tengo que mandar. Pero non *nun téngovosles que mandar.
XXIII.
La oración
y les funciones
oracionales
369