Gramática - Academia de la Llingua Asturiana

XXIII.
La oración
y les funciones
oracionales
368
sé si vos dar les gracies; déxa-y claro si saludalu o non o déxa-y claro
si lu saludar o non.
- Secuencia interrogativu ya infinitivu: nun sabemos qué regala-y o nun
sabemos qué-y regalar; hai que decidir a cuála dá-ylo o hai que decidir
a cuála-y lo dar; nun tien ónde ponelo o nun tien ónde lo poner;
escaecí pa ú llevalos o escaecí pa ú los llevar; asegúrate de cuánto dayos
pal aguilandu o asegúrate de cuánto-yos dar pal aguilandu.
- Secuencia relativu ya infinitivu: nun atoparon casa onde agospiase o
nun atoparon casa onde s'agospiar; nun alcuentren fecha cuando casase
o nun alcuentren fecha cuando se casar.
- Infinitivu precedíu de la negación nun. Exemplos: nun comentá-yoslo
paezme poco serio o nun-yos lo comentar paezme poco serio; entráronme
ganes de nun facevos casu o entráronme ganes de nun vos facer
casu.
- Infinitivu precedíu d'interrogativu o esclamativu: ¿ónde escondenos? o
¿ónde nos esconder?; ¿cuándo llamalos? o ¿cuándo los llamar?; ¿cómo
avisalu? o ¿cómo lu avisar?; ¡qué dicite, manín! o ¡qué te dicir, manín!
L'infinitivu precedíu de preposición –que se pue suprimir nel casu de de–
tolera namái la enclisis: tengo ganes de llamalu, naguaben por saludanos,
y non *tengo ganes de lu llamar, *naguaben por nos saludar.
4.4.2 COL XERUNDIU
De mou asemeyáu a lo qu'asocede col infinitivu, tamién col xerundiu son
posibles la enclisis y l'alternancia llibre de proclisis y enclisis.
a) Enclisis.
L'allugamientu básicu del pronome átonu col xerundiu ye tamién la enclisis.
Exemplos: púnxose de pies sofitándose con un cayáu; falándo-yos
asina nun igües nada; en secándome la ropa, colo pa casa.
b) Alternancia llibre de proclisis o enclisis.
De modu asemeyáu a lo qu'aportaba col infinitivu, delles circunstancies
favorecen la proclisis del pronome átonu respeuto del xerundiu, pero nun
obliguen a ella. Nel casu del xerundiu, esti fenómenu namái ye a vese cola
negación nun. Exemplos: nun reñéndolu muncho remóntasete volao o nun
lu reñendo muncho remóntasete volao; acabaron nun aconceyándose los
llunes o acabaron nun s'aconceyando los llunes.