Gramática - Academia de la Llingua Asturiana

XXIII.
La oración
y les funciones
oracionales
366
- Proclisis por allugamientu preverbal d'otros indefiníos y alverbios de
conteníu diversu.
Nestos casos, l'indefiníu o alverbiu ye llibre d'asitiase delantre del verbu o
tres d'él. Si s'asitia tres del verbu, el pronome enclíticu caltendráse nesa
posición; pero nel intre que se tresllada a un allugamientu preverbal, provoca
automáticamente la proclisis del pronome. Pue vese esti doble comportamientu
nestos exemplos, alvirtiendo de les diferencies d'énfasis que
tán presentes nellos: enllordiómelu tou / tou me lu enllordió; eso failo
cualquiera / eso cualquiera lo fai; atopámoslu siempre en chigre / siempre
lu atopamos en chigre; viéronlu tovía con vida / tovía lu vieron con
vida; lléguenvos les cartes tarde / tarde vos lleguen les cartes; quíxola
tanto... / tanto la quixo...; a ellos di-yos tamién les gracies / a ellos tamién-
-yos di les gracies; soltáronnoslu yá / yá nos lu soltaron; faltónos solo
(namái) un cachín / solo (namái) nos faltó un cachín; prestóme muncho
(poco) la película / muncho (poco) me prestó la película; vendiólu quiciabes
/ quiciabes lu vendió.
N'otros casos, l'alverbiu solamente almite l'allugamientu preverbal: sí vos
falé d'ello; sí me paez que metisti'l cuezu nesi asuntu. Convién estremar
estos usos d'aquellos onde l'alverbiu ta xebráu por una pausa, faciendo
función de reproductor d'una oración, y, poro, nun s'allugando na mesma
oración que'l verbu: sí, falévos d'ello; sí, paezme que metisti'l cuezu nesi
asuntu.
c) Allugamientu preverbal con interrogativos y esclamativos.
N'oraciones interrogatives direutes los axetivos, pronomes o alverbios
interrogativos provoquen siempre, al allugase antes del verbu, la proclisis
de los pronomes átonos al verbu. Exemplos: ¿qué-yos contó a los rapazos?;
¿a quién-y empresté dineru?; ¡quién vos lo dixera!; ¿cuála me dio
un besu?; ¡ónde s'esconderíen!; el carné, ¿cuándo vos lu dan?; ¿cómo se
faen les casadielles?; ¿cuántos llibros me regalastis?
d) Énfasis acentual d'un sintagma allugáu ante'l verbu.
La proclisis del pronome átonu ta provocada al empar pol allugamientu
preverbal d'un sintagma y pol énfasis acentual nél.
D'esta miente, nos dos exemplos que siguen darréu, el sintagma esti rapaz
va allugáu detrás o delantre del verbu, pero l'ausencia d'un énfasis acentual
nun trai consecuencies nel allugamientu pronominal: díxonoslo esti
rapaz; esti rapaz díxonoslo.