Gramática - Academia de la Llingua Asturiana

XXIII.
La oración
y les funciones
oracionales
362
- Los numberales fraccionarios y multiplicativos en función alverbial, que
funcionen como complementu circunstancial ensin preposición nenguna:
esi xatu val la metá, el fíu ye la metá de bonu que'l pá, ganen un terciu,
trabayen la cuarta parte, un pisu equí val el doble que nel centru,
quierlos el triple.
3.7.2 TRESPOSICIÓN VERBU ’ ALVERBIU
Permite qu'una oración funcione como complementu circunstancial, y llógrase
per aciu de conxunciones (de llugar, temporales, modales, concesives,
causales, etc.) o de relativos. Exemplos: présta-y fumar onde nun
molesta, fuelguen cuando-yos apetez, mientres yo llendo les vaques ella
salla les pataques, en cuantes garre les vacaciones salgo de viaxe, namás
lu vi dime cuenta de lo vieyu que ta, desque ye direutora nun hai quien fale
con ella, nes romeríes baillen como-yos deprendieron, presentó una quexa
na direición porque nun-y dieron bon tratu, si n'agostu ficiere bon tiempu
vendríen munchos turistes, siempre aprueben anque nun estudien nada,
etc.
3.7.3 ADAUTACIÓN MORFOLÓXICA
Otres vegaes la tresformación n'alverbiu llógrase non per tresposición sintáctica
sinón per adautación morfolóxica.
Un axetivu conviértese funcionalmente nun alverbiu n'inmovilizándose
cola terminación propia del neutru; ver VII.2.2. Exemplos: préstame poco
esa película, convién filar fino, miróme torcío, trabaya mui curioso, corríen
rápido, colaron escapao, espresáronse claro, ¿fíxolo igual o d'otra
miente?, cantaben sele, falái prudente, yá fala regular l'inglés.
Los indefiníos cuantificadores empléguense davezu adautaos a alverbios,
pudiendo entós exercer función de complementu circunstancial (nestes
condiciones, l'alverbiu tanto cueye obligadamente la forma tan cuando
s'antepón a un axetivu o a otru alverbiu). Exemplos: el pan gústa-yos
poco; les mazanes maurecieron abondo; glayaron enforma, pero nun-yos
fixeron casu; recen a esgaya; trabayen muncho la madera; esi neñín duerme
demasiao pal tiempu que tien; nun fures tanto esi maderu; ye tan llambión
como'l pá; trabayen más qu'enantes; el to pueblu ta más lloñe que'l
nuesu; faló menos porque taba cansu. Lo mesmo fai l'axetivu interrogativu
cuántu -a -o: ¿cuánto quedrá a los fíos?; nun sabe cuánto quier a los
fíos.
Un axetivu pue adautase a alverbiu inmovilizándolu na terminación femenina
y amestándo-y el sufixu -mente, de mou que llogra asina exercer la