Gramática - Academia de la Llingua Asturiana

A diferencia del restu de les funciones oracionales, el complementu circunstancial
pue coesistir nuna mesma oración con otru u otros sintagmes
de la mesma función: nosotros dexamos siempre el coche equí, vímosvos
tarde ayeri, apriesa faes les coses mal.
3.7 Tresposiciones y adautaciones alverbiales
Otros sintagmes que nun son de mano alverbios, puen tresponese a esta
categoría y funcionar normalmente como complementu circunstancial.
Estes son les principales tresposiciones a alverbiu:
3.7.1 TRESPOSICIÓN SUSTANTIVU ’ ALVERBIU
Llógrase per aciu de preposiciones diverses, lo que-y permite al sustantivu
funcionar como complementu circunstancial.
Exemplos: los pelegrinos xuben al Naranco, manifestarémonos ante'l parllamentu,
firmó'l contratu baxo condiciones abegoses, vamos sentanos
cabo'l fueu, clavó les puntes con un martiellu, estampanóse contra la
muria, vien de casa Xuacu, l'agua baxa dende aquelles peñes, les llaves
que perdiera atopéles en camín, Cuideiru ta ente Avilés y L.l.uarca, andaben
hasta la ilesia, merquen flores pa les ventanes, los camiones nun
pasen pel puertu, trabayastis munches hores polos vuesos fíos, escriben
ensin lluz, el gatu ta sol escañu, el texu ta tres la muria, etc.
Nuna riestra de casos, la tresposición de sustantivu a alverbiu en función
de complementu circunstancial verifícase ensin preposición nenguna.
Asina apuerta con:
- Los nomes de los díes de la selmana. Exemplos: el llunes aconcéyense
toles comisiones, los domingos piesllen toles tiendes. Compórtase de la
mesma manera'l sustantivu víspora: los domingos y les víspores piesllen
toles tiendes. Sicasí, nun asocede talo colos nomes de meses: en xineru
entama un cursu d'inglés, vímoslu en xunetu.
- Los sustantivos de referencia temporal en rellación de solidaridá con otru
términu. Trátase davezu de sustantivos con axetivos especificadores,
como en nun llovió esta selmana, esi día quixo más quedar en casa, o
de sustantivos con oraciones axetives, como en emprimamos les escavaciones
el mes que tu quieras.
- Les locuciones formaes por un sustantivu repetíu con una preposición
metanes. Exemplos: día a día van dexando la vida nel esfuerzu, llantáronse
costazu con costazu, entraron casa per casa.
XXIII.
La oración
y les funciones
oracionales
361