Gramática - Academia de la Llingua Asturiana

XXIII.
La oración
y les funciones
oracionales
360
3.5 Tresposiciones a sustantivu
Toles funciones oracionales nominales pue exerceles el sustantivu autónomamente.
Les demás categoríes sintáctiques (axetivu, alverbiu y verbu)
pue tamién exerceles, pero pa ello han tresponese a sustantivu: él subió nel
coche colloráu y ella nel blancu; acuérdase muncho del ayeri; díxonos
que quería.
Les tresposiciones a sustantivu son les siguientes: verbu ’ sustantivu (ver
XXV.2.1), axetivu ’ sustantivu (ver VI.2.4) y alverbiu ’ sustantivu (ver
XIV.4).
3.6 Complementu circunstancial
La función de complementu circunstancial (llamáu tamién aditamentu)
desempéñala un sintagma de categoría alverbial que fai de términu subordináu
del nucleu verbal.
La categoría alverbiu exerce siempre esta función ensin necesidá de nengún
índiz preposicional: nosotros dexamos el coche equí, vímosvos pel
parque ayeri, faes les coses apriesa, treslladámonos lloñe, etc. Como
alverbios que son, compórtense igual los xerundios: faes les xeres cantando.
Diverses preposiciones puen preceder al alverbiu nun faciendo otro
qu'especificaciones de mena semántica: ¿a ónde vas tan afatada?, dellos
corríen contra arriba, surdieron d'equí, dende lloñe nun se siente un res,
¿n'ónde vive Xuan?, ente ayeri y güei iguáronse les coses, caminaron
hasta cerca'l pueblu, el fumu subía haza equí, dellos van p'abaxo, los
ciclistes pasen per delantre, en terminando avísesnos, etc.
El complementu circunstancial ye a camudar llibremente de llugar dientro
la oración, dependiendo esto namái del énfasis buscáu: equí nosotros
dexamos el coche - nosotros equí dexamos el coche - nosotros dexamos
equí'l coche ~ nosotros dexamos el coche equí ; ayeri vímosvos pel parque
- vímosvos ayeri pel parque ~ vímosvos pel parque ayeri; apriesa faes
les coses - faes apriesa les coses ~ faes les coses apriesa.
Cuando un complementu circunstancial se da por consabíu nel contestu,
pue nun dexar nengún niciu, o bien dexar otru alverbiu de mena referencial
xenérica: posaron los tarecos nesi escañu de xunto a la puerta ’ posaron
los tarecos ende, naquelles dómines cuando yera moza toos camentaben
que taba lloca ’ entóncenes toos camentaben que taba lloca, cuéntovos
estes coses como me deprendieron a contales ’ cuéntovos estes
coses asina.