Gramática - Academia de la Llingua Asturiana

esperar (por), quexar / quexase (de), etc. Exemplos: esi señor paez mio
tíu, esi señor paezse a mio tíu; eses cartes asemeyen una amenaza, eses
cartes aseméyense a una amenaza; piensen coses espantibles, piensen
en coses espantibles; falamos lo que nos petez, falamos de lo que nos
petez; nun creyemos esos bilordios, nun creyemos nesos bilordios; atopé
al fíu del caseru, atopéme col fíu del caseru; rin les gracies del güelu,
rinse de les gracies del güelu; entrugué una cosa namái, entrugué por
una cosa namái; esperaben l'autobús, esperaben pol autobús; lo que-y
pasó nun lo quexa, nun se quexa de lo que-y pasó.
- Otros verbos almiten suplementu como una alternativa reforzada o enfatizada
respeuto a la construcción normal con complementu direutu.
Exemplos: atender / atender (con), comer / comer (per), beber / beber
(per), puyar / puyar (per), reñer / reñer (per), tocar / tocar (de), etc.
Compruébese nestes oraciones: nun podíen atender el neñu / nun podíen
atender col neñu; diéron-yos fabes y comiéronles con gustu / y
comieron per elles con gustu; bebió lleche hasta fartucase / bebió pela
lleche hasta fartucase; puyaben la xata / puyaben pela xata; reñó al
xenru tolo que quixo / reñó pel xenru tolo que quixo; nun toques los
cables, nun los toques / nun toques de los cables, nun toques d'ellos.
Otres vegaes, la construcción de suplementu asóciase al conteníu partitivu:
comieron pan / comieron del pan (nun confundir con comieron dél
pan "comieron daqué de pan, un pocu de pan"); bebistis sidra / bebistis
de la sidra (nun confundir con bebistis della sidra "bebistis daqué de
sidra, un pocu de sidra").
Pa cabu, un grupu de verbos almiten la coesistencia de dambes funciones:
enllené de lleche'l vasu, empleguen el dineru en mercar máquines nueves,
diz llocures de la fía, defendió de los abusos a los vecinos, llimpien el
suelu de morgazu, llibrástime de munchos perxuicios, oblíguennos a amenorgar
la velocidá, etc.
3.4.3 INCREMENTU REFLEXIVU
Como yá se vio, dellos verbos de suplementu nun puen emplegase si nun
van acompañaos de pronomes átonos reflexivos. Talos pronomes yá nun
faen función sintáctica nenguna, sinón que formen parte del verbu
mesmu. Esti ye'l casu de verbos como arrepentise, esmucise, etc. Asina,
por exemplu, el verbu arrepentise en presente d'indicativu ye arrepiéntome,
arrepiénteste, arrepiéntese, arrepentímonos ~ arrepentímosmos,
arrepentísvos, arrepiéntense, nun siendo posible *arrepiento, *arrepientes,
etc.
XXIII.
La oración
y les funciones
oracionales
359