Gramática - Academia de la Llingua Asturiana

XXIII.
La oración
y les funciones
oracionales
358
munches coses aquella nueche Xuan charraba ~ aquella nueche de munches
coses Xuan charraba ~ aquella nueche Xuan de munches coses charraba.
3.4.2 COESISTENCIA DE SUPLEMENTU Y COMPLEMENTU DIREUTU
Suplementu y complementu direutu cumplen un papel semánticu asemeyáu
respeuto del lexema verbal. Esti fechu produz que dambes funciones
nun seyan davezu compatibles na mesma oración. Nesti sen, constátase la
esistencies de delles tribes de verbos.
Unos verbos namái son a construyise con suplementu. Ye'l casu de munchos
verbos pronominales, como enfotase (en), arrepentise (de), atrevese
(a), astenese (de), burllase (de), chanciase (de), referise (a), etc. Otros
verbos non pronominales atópense tamién nesta circunstancia: carecer
(de), equivalir (a), naguar (por), allampiar (por), golar (por), rispir (por),
apencar (con), abusar (de), desconfiar (de), depender (de), sonar (a), etc.
Pel so llau, una llarga llista de verbos constrúyense siempre con complementu
direutu.
Otros verbos almiten construyise con complementu direutu o bien con
suplementu, pero amosando diferencies de significáu: mirar "ver" / mirar
(por) "curiar" / mirar (de) "tentar, procurar"; reparar "iguar" / reparar
(en) "fixase"; aspirar "sorber" / aspirar (a) "querer llograr"; cuntar "númberos,
un cuentu" / cuntar (con) "tener disponible"; facer / facer (de)
"exercer, representar", etc.
- Ente estos verbos atópense los que se camuden en pronominales cuando
se constrúin con suplementu: fiar "dexar en fianza" / fiase (de) "enfotase";
ocupar "tomar sitiu" / ocupase (de) "tener xera, tratar"; agarrar
"tomar" / agarrase (con) "nuna engarradiella"; amarrar "atar" / amarrase
(con) "nuna engarradiella"; acabar "finar" / acabar (con) "desaniciar";
despidir "echar" / despidise (de) "saludar enantes de marchar";
esmucir "catar" / esmucise (de) "refugar responsabilidaes"; acordar
"tomar un determín" / acordase (de) "recordar"; facer / facese (con)
"apoderase"; doler "dar dolor" / dolese (de) "compadecese"; negar "dicir
non" / negase (a) "refugar"; llegar "algamar un sitiu" / llegase (a) "averase".
- Otros verbos alternen l'usu de suplementu y de complementu direutu
ensin malpenes camudar el significáu: paecer / paecese (a), asemeyar /
asemeyar (a), pensar / pensar (en), falar / falar (de), creyer / creyer (en),
atopar / atopase (con), rir / rise (de), entrugar / entrugar (por), esperar